Ne Ohiaríha 2019 shiiohserò:ten, Canadian Radio-television and Telecommunications Commission (CRTC) wahonhténtia’te ne Broadcasting Notice of Proceeding CRTC 2019-217, né:’e ne áhsen ní:kon tsi na’teká:ron nikarihwè:son’s skátne tenhatiié:na ahatikwatá:ko ne kaianerenhserá:se ne Onkwehón:we ratirihowanáhtha raotirihwà:ke. Ne tiotierénhton tsi na’teká:ron wahshakoti’nikonhrí:sake ne káti akatokénhston tsi nenhotiriho’ténhake táhnon to niió:re enhotiió’ten tsi shakoti’nikonhrí:saks ne thiionkwe’taténion, táhnon aontena’tónnionke nahò:ten tehonatonhwentsió:ni ne Onkwehón:we tsi ratirihowanáhtha tsi Koráhne.
Tsi na’tekiátere Ohiaríha 2019 táhnon Enníska 2020 shiiohserò:ten, Commission wahatitsiénhaien skátne ne Onkwehón:we ratirihowanáhtha, nia’té:kon ronón:nis táhnon ratiráhstha tsi nikarì:wes ne 12 ní:kon nikatsiénhaien tsi shakoti’nikonhrisákhon ohwentsiakwé:kon ne Koráhne. Shakoti’nikonhrisákhon katsienhaién:ton thonahtentià:ton ne Indigenous Leadership Development Institute Inc. (ILDII) skátne ne Onkwehón:we ronterihwahtentià:tha. Teiohtharáhkwen ka’nikonhraientà:tha wahshakotihiatonhserawínion né:ne karihwanóntha kahiatónnion ne tsi ní:ioht tsi Commission enwá:ton kwah tokén:’en ahshakoti’nikonhrisákhon ne eh ní:kon tsi enwá:ton ne Onkwehón:we raotinakerahsera’shón:’a. Onkwehón:we ratirihowanáhtha táhnon nia’té:kon ronón:nis ne ò:ni ronwatirihwanontón:ni tahontekháhsi tsi ní:ioht tsi ia’tehatiká:nere ne nahò:ten rotinoròn:se táhnon ronate’shén:naien e’thóhtsi akanà:ton ne Onkwehón:we ratirihowanáhtha kaianerenhserá:se.
Né:ne thikén:’a í:ken ne nahò:ten ronanonhtónnion tsi nikarì:wes kí:ken katsienhaientónhne kakarokerí:’on ehtà:ke nonká:ti. Ne ki’ ahsatkáhtho ne kwah tokén:’en ka’nikonhraientà:tha nahò:ten tehonatekhahsiónkwen ne ronatià:tare, ahsathón:tate ahsesákha ne ohiatonhserakwé:kon kahiatonhseríhson kén:tho .
Ronatià:tare é:so wahati’nikòn:ron ne tsi ní:ioht tsi enwá:ton CRTC ahatirihwahní:rate tsi tkarihwaié:ri akénhake tsi tenhatiié:na ahonhténtia’te ne Onkwehón:we ratirihowanáhtha raotiianerénhsera. Wahatirihwà:reke tsi niiorihowá:nen naierihwakwénienhste ne owennóhskon’k í:ken tsi nihotirihò:ten ne Onkwehón:we táhnon ahshakotinatahré:na’se tsi shakoti’nikonhrí:saks tsi nón:we táhnon kátke né:’e enwá:ton. Ronatià:tare ne ò:ni wahatiierón:nitste tsi niiorihowá:nen aierihwarò:roke nahò:ten ronanonhtónnion ne nia’tekanakerahserá:ke táhnon ne aieién:teren’ne kató:ken kentiohkwa’shón:’a né:ne Onkwehón:we, Othore’kehró:non táhnon Métis niionkwe’tò:tens.
Tsi nikarì:wes shakoti’nikonhrisákhon e’thóhtsi ahati’nikòn:raren shikatátie ne Onkwehón:we ratirihowanáhtha táhnon aontahonteweièn:ton tsi enhonterihwahténtia’te. Wahatirì:wenhte tsi teiotonhwentsióhon ia’tahatí:ieste kaianerénhsera orihwa’shón:’a táhnon akaién:tere’ne ne Onkwehón:we niwen’nahsò:tens ne káti ioiánere ní:ioht ahshakoti’nikonhrí:sake, ne ò:ni ne ahonwati’nikonhrí:sake ne Rotiksténha nok nithotiiòn:sas. Ronatià:tare ne ò:ni wahatihthá:rahkwe tsi niiorihowá:nen naierihwakwénienhste kaianerenhserá:ien táhnon orihwí:io aiakón:ni tsi ok ní:ioht entsiontatkária’kse ne Onkwehón:we thonatià:tare tsi wahatinaktó:ten, wa’thontekháhsi raoti’nikòn:ra táhnon nahò:ten ratirihwaienté:ri.
Wahonthró:ri tsi niiorihowá:nen naiako’nikonhraién:ta’ne nahò:ten tehonatonhwentsió:ni ne Onkwehón:we ratirihowanáhtha né:ne kaná:takon táhnon ohwentsia’kékha nón:we thatì:teron, ne ò:ni ne Othorè:ke kanakerahseraién:ton. Ne orihwí:io aiakón:ni tsi ronatiohkowá:nen enhontià:taren, nia’té:kon wahonwati’nikòn:ron nahshakononkwe’tatshén:ri, kwah né:ne Thiionkwe’taténion Rotiienawà:se Karihowanahtánion tsi waterennótha táhnon ne tkaia’tárha táhnon karonwarà:ke teiehtharáhkwa, táhnon tsi kató:ken ahshakotihthárhahse ne kanakeráhsera ohén:ton rón:nete. Ronatià:tare wahatirihwà:reke tsi e’thóhtsi thieió:ken akénhake tsi shakoti’nikonhrisá:kon táhnon ahatíhsere ne skarì:wa nikaianerenhserò:ten.
Ronatià:tare wahatirihwanòn:we’ne tsi ní:ioht tsi karihwahserón:ni tsi shakoti’nikonhrisákhon, watena’tón:ni tsi wahatirihwakwénienhste ne Onkwehón:we nihotirihò:tens. Ronerien’tiió:’on tsi Onkwehón:we wahatirihwahserón:ni táhnon wahati’nikonhrarátie ne Onkwehón:we ronterihwahtentià:tha.
Wa’akwarihwà:ronke tsi ní:ioht tsi Onkwehón:we kanakerahsera’shón:’a kontena’tón:ni tsi niionakátste táhnon rontste’niá:rons ahotiianeráhsten tsi ratirihowanáhtha nihotiio’tenhserò:tens. É:so nihá:ti Onkwehón:we ratiweién:te tsi iontahónhsatats táhnon iontahónhsatats-iontkáhthos nia’té:kon ronón:nis Tsi ronaterihwaién:ni ne Onkwehón:we waterennótha ne ahshakotihretsiá:ron Onkwehón:we ronterennótha táhnon ahontié:nawa’se Onkwehón:we kanakerahsera’shón:’a aonsahatihará:tate ne raotiwén:na táhnon tsi nihotirihò:ten né:’e wahatinà:ton tsi iakoianerahstáhkwen né:’e. Tsi shakotiienawà:ses ne Onkwehón:we karén:na nikanakerahserò:tens, kwah né:ne kanakerahserá:ien Manitoba nón:we, wahatiién:tere’ne tsi iorihowá:nen né:’e ne aiakoianeráhsten ne Onkwehón:we ronterennótha táhnon raotirenna’shón:’a. Ne Indigenous Screen Office wahatiwennò:roke tsi iorihowá:nen tsi shakotiienawà:se Onkwehón:we ratikaratónnions tsi róntstha ne teióiaks.
Ronatià:tare ne ò:ni wa’thontenonhwerá:ton tsi ronahtentià:ton ne Aboriginal Peoples Television Network (APTN), né:ne rotiwenná:wi ne Onkwehón:we ratiká:ratons. CBC North ne ò:ni iá:ken tsi ákta thonate’nikonhraierà:ton, táhnon rotiianerahstén:ni tsi nihontiérha, ótia’ke ronatià:tare eh wahonnonhtónnion. Ronátia’ke wahatihthá:rahkwe ne iah tehononkwehón:kwe nikentiohkò:tens né:ne tahotiio’tátie ahatirihwakará:tate ne Onkwehón:we nahò:ten ronón:ni.
Ronatià:tare wa’thonterihwáhthe’te nia’té:kon nahò:ten kaió’tats ne Onkwehón:we ratirihowanáhtha táhnon nia’té:kon ronón:nis ne kwah ahontià:taren ne akwé:kon tsi nihontiérha tsi ratirihowanáhtha tsi Koráhne.
Tsi waterennótha ratirihowanáhtha: Onkwehón:we tsi waterennótha né:’e kwah iorihowá:nen tsi ratihtharáhkwa raotinakerahserá:kon, nek tsi ronentorà:se iekaié:ri ahotihwistaién:ta’ne. É:so ahatinòn:we’ne ahontenhní:non ne advertising nek tsi wa’kèn:re tsi wate’shén:naien. Tsi náhe nón:wa kaianerenhserá:ien ne Onkwehón:we ratirihowanáhtha kanà:tons tékeni ní:kon ne Type ne tsi waterennótha (Type A táhnon Type B), né:ne tká:konte tetsiá:ron raoná:wen akénhake ne iah teionthwistonnià:tha nikentiohkò:tens, ótia’ke wahati’nikòn:ron tsi teiotonhwentsióhon ó:ia type akénhake né:ne sénha enkarihwáhsere ne ionthwistonnià:tha tsi waterennótha. Iaweronhátie, thóha akwé:kon rón:nehre tsi Onkwehón:we waterennótha e’thóhtsi iah tha’taieká:nere tóka’ni aionhténtia’te kwah né:ne kowá:nen ratirihowanáhtha kentiohkwa’shón:’a, tóka’ni ahatíhsere sha’tekaianerenhserò:tens.
Ratirihowanáhtha rontstahkwa’shón:’a: Teiohna’netárion tsi ní:kon rotiwennohrókhon tsi na’tehonatonhwentsió:ni ne kanonhsó:ton táhnon iontstáhkwa. Ronatià:tare wahatihthá:rahkwe tsi iotkà:te teiotià:kon ne iontstáhkwa né:ne wentó:re aonsaiekwatá:ko ahse’kén í:non aonhá:’ok tkanakerahserá:ien táhnon iah tehononkwè:taien né:ne ronateweiénhston. Tkaia’tárha ratirihowanáhtha iontstáhkwa ne Othorè:ke kanakerahserá:ien wahonní:ron tsi né:’e kwah iokaión:’on. Tehonatonhwentsió:ni sénha á:se táhnon tka’seronnénhton tsi nikanó:ron broadband akaronwarahrónnionke, né:’e tsi sénha taiorihowanha’onhátie ne á:hontste ahontahónhsatate táhnon ahonterò:roke tkaia’tárha, ne aieweientéhta’ne, táhnon ne aierihwatshén:ri iorihowá:nen orihwa’shón:’a.
Karén:na táhnon iontahónhsatats-iontkáhthos nia’té:kon naho’ténhshon ronón:nis: Onkwehón:we nia’té:kon ronón:nis wa’thontekháhsi ne shá:ka tehoti’nikòn:rhare. Ioiánere tsi ní:ioht tsi tehonwatiwennáhkwen ne Onkwehón:we ratirihowanáhtha, wahonthró:ri tsi na’teiotonhwentsióhon sénha ronatiohkowá:nen ahshakotiwennaníhara’ne. Ne káti eh nahóntiere, wahón:nehre tsi kahionhakwe’ní:io waterennótha nok tkaia’tárha ratirihowanáhtha e’thóhtsi ahonhténtia’te ok na’tekaià:kon ne nahò:ten waterennótha Onkwehón:we ahonón:nike. Kí:ken tsi teiotonhwentsióhon Onkwehón:we ahshakotikaratónhahse ne sénha ronatiohkowá:nen né:ne iah tehononkwehón:we né:’e ò:ni tho ní:ioht ne karonwarà:ke. Ronatià:tare wahatiwennò:roke tsi kaió’tats ahonón:ni táhnon ahonhténtia’te nahò:ten Onkwehón:we ronón:ni ahse’kén tiotò:ktani ne ohwísta.
Kahionhakwe’ní:io ratirihowanáhtha iorihowá:nen ronaterihwaién:ni: Nahò:ten ronaterihwaién:ni ne kahionhakwe’ní:io ratirihowanáhtha tsi shakotihretsiá:rons táhnon tehshakotina’kè:rons ne Onkwehón:we né:’e wahatirihwakará:tate tsi nikarì:wes ne shakoti’nikonhrisákhon katsienhaién:ton. Ronatià:tare wahatiwennò:roke tsi na’teiotonhwentsióhon ne iah tehononkwehón:we ratirihowanáhtha ahatiién:tere’ne nahò:ten ronaterihwaién:ni ahatirihwísa nahò:ten ne Koráhne shakotiká:rote ne Onkwehón:we. É:so nihá:ti wahón:nehre tsi tóka’ tká:konte ok na’tekaià:kon ne nahò:ten waterennótha, enwá:ton Onkwehón:we ronón:ni akénhake, né:’e sénha aiontaterákwahse tsi ní:ioht ne “kahretsiarónhsera”. Ronatià:tare ne ò:ni wahatiierón:nitste tsi e’thóhtsi sénha é:so Onkwehón:we ia’tahontonkwe’taiéhstonke ne thonnónhton’s táhnon ronterihwatsteríhstha ne iah tehononkwehón:we ratirihowanáhtha. Tóka’ ahshakotihretsiá:ron ne ratirihowanáhtha ronteweiénhstha tsi shakotihwistá:wis nok shakotiio’tenhserá:wis né:’e ronatkáhthon tsi enwá:ton eh ní:ioht ia’tahatí:iehste tsi á:se Onkwehón:we ratiweién:te enkénhake.
Ronatià:tare wahonthró:ri tsi tehoti’nikòn:rhare tsi iah tehononkwehón:we kentiohkwa’shón:’a rotihwistaién:ta’s ne ahonón:ni Onkwehón:we rononní:’on. Wahonthró:ri tsi na’teiotonhwentsióhon ahonhténtia’te ne kaianerénhsera ne akarihwahní:rate tsi Onkwehón:we ronón:ni nó:nen kahionhakwe’ní:io waterennótha tká:konte ahonhténtia’te ne Onkwehón:we rononní:’on.
Ronatià:tare wahón:nehre tsi ratirihowanáhtha ratirihwakarénies ne nahò:ten iah tóske té:ken ne Onkwehón:we raotirihwà:ke, táhnon tsi Onkwehón:we nihotirihò:ten táhnon nihatiwennò:ten tká:konte sénha ioiánere tsi enwatena’tón:ni tsi ratirihowanáhtha. É:so nihá:ti wahatirihwà:reke tsi niiorihowá:nen ahshakoti’nikonhratihéntho tsi nihotirihò:ten ahatiienteríhake tsi ratirihowanáhtha. Tóka’ Onkwehón:we ratirihwaienté:ri eh ahonnè:seke eh enkarihwahní:rate tsi tkaié:ri táhnon watena’tón:ni Onkwehón:we tsi nihotirihò:ten táhnon tsi nithonehtáhkwen. Thonéhton ne ò:ni wahatihthá:rahkwe tsi kwah tokén:’en teiotonhwentsióhon akarihwahnirá:ton tsi teiorihwahsteríhens karihowanáhton Onkwehonwehnéha enwatewennontáhkwenke.
Tehonwatiwennáhkwen ne Onkwehón:we eh nón:we rotiió’te: Ronatià:tare wahatiierón:nitste tsi niiorihowá:nen tsi waterennótha ahonwatínha’ne tsi niiá:kon eh kanakerahserá:ien ienákere. Nek tsi, teiotonhwentsióhon Onkwehón:we ahonwatinhá:’on tsi ratirihowanáhtha rotiio’ténion. Sénha é:so Onkwehón:we tká:konte ahontià:taren tsi ratirihwénhtha, ne kwah nó:nen ratikwatákwas ne shakotihwistá:wis kentióhkwa táhnon nahò:ten teiotonhwentsióhon ne akahretsiá:ron ne Onkwehón:we ahonnón:ni. Ronátia’ke wahati’nikòn:ron tsi tká:konte kahionhakwe’ní:io ratirihowanáhtha iahshakotirihwahronkhà:ten tsi niionkwè:take Onkwehón:we shakotinhá:’on. Ratirihowanáhtha e’thóhtsi akarihwahnirá:ton tsi rotirihwahserón:ni ahshakotínha’ne, ahshakotiweiénhsten táhnon ahshakonatia’tará:ko ne Onkwehón:we rotiió’tens.
Teiotonhwentsióhon sha’tehonátte akénhake: Ronatià:tare wahatihthá:rahkwe tsi iah sha’tehonátte té:ken né:ne e’thóhtsi kaianerénhsera e’thóhtsi aonsakakwatá:ko ne káti Onkwehón:we ratiráhstha, nia’té:kon ronón:nis táhnon ratirihowanáhtha sha’tehonátte ne iah tehononkwehón:we tsi nón:we ne ohwísta aorihwà:ke, tsi ió:kenht ne raotiio’ténhsera, rotiién:ta’s iontstáhkwa táhnon kanonhsó:ton.
Ronatià:tare iorihowá:nen nahò:ten wahati’nikòn:ron ne aorihwà:ke ne ate’shén:naien sénha aonsahatiiánerahste táhnon oh ní:ioht enwá:ton aonsahatikwatá:ko ne è:neken kahiá:ton orihwa’shón:’a.
Kaia’takehnhà:tshera ahotiié:nawa’se ne Onkwehón:we tsi waterennótha ratirihowanáhtha: Ronatià:tare wahón:nehre tsi sénha é:so ohwísta tehonatonhwentsió:ni ne káti Onkwehón:we waterennótha sénha enhotiio’tenhserí:io’ne tsi shakotiienawà:se ne raotinakeráhsera. Ahshakotihwíhston ahshakotiia’tínion’te ne ratirihwaienté:ri ne ahonwatiweiénhsten, táhnon ahshakotikária’kse né:ne ahontá:ti owerà:ke, né:’e akaié:nawa’se akakówanahte tsi ní:kon táhnon tsi na’tekonttihánion tsi ronón:ni.
Kaia’takehnhà:tshera ahotiié:nawa’se ne Onkwehón:we ratiráhstha táhnon nia’té:kon ronón:nis: Ne káti Onkwehón:we ronterennótha ahonwatiia’tatshénrion táhnon aonsahonwatikarià:kse, ótia’ke wahati’nikòn:ron tsi e’thóhtsi akakwatákwen ne karò:ron karonwarà:ke. Ronatià:tare ne ò:ni wahón:nehre tsi enwá:ton sénha nahotiié:ren ne copyright collectives ne ahatiié:nawa’se ahatiién:tere’ne táhnon ahatíhsere Onkwehón:we raotirenna’shón:’a akwé:kon ratirihowanáhtha ronhtentià:tha ne káti ronón:ni iekaié:ri ienshonwatikária’kse. Ótia’ke wahón:nehre tsi CRTC enwá:ton ahshakotiié:nawa’se eh nón:we tóka’ ahshakonanónhton’se tsi waterennóntha orihwí:io ahonatena’tón:ni tsi rotikarià:kon ne copyright kakarótha. Enhotiié:nawa’se ò:ni ne ronterennótha ahontéweienhste ne copyright aiontatshennínionte táhnon aierò:roke.
Ronatià:tare wahón:nehre tsi Onkwehón:we ratiká:ratons e’thóhtsi tahatiié:na táhnon tóhsa tahontkén:ni ahotihwistaién:ta’ne. Tsi tehotirihwaienawà:kon ne Onkwehón:we táhnon iah tehononkwehón:we ronón:nis kentiohkwa’shón:’a ronatkáhthon tsi ioiánere tsi shakonate’shennaién:nis ne Onkwehón:we ratiká:ratons ia’tahóntieste. Ronatià:tare ne ò:ni wahón:nehre tsi e’thóhtsi sénha é:so iontstáhkwa akaién:take, tho akarátie ne kahionhakwe’ní:io ratirihowanáhtha, ne akahretsiá:ron Onkwehón:we karihwanákere tehatiristò:raraks táhnon owerà:ke ratiwenníneken’s, ahse’ken enwá:ton ahonón:ni nia’té:kon wathró:ri tsi ní:ioht tsi ia’tehatiká:nere ne raotinakeráhsera.
Nithotiiòn:sas, kaweienhtehtà:tshera táhnon kaweienhstà:tshera: Tóka’ ahshakonate’shennaiénhahse ne Onkwehón:we nithotiiòn:sas né:’e enthoti’nikonhratihénthwahte ne ratirihowanáhtha aorihwà:ke táhnon enkentiohkwakwatákwenke ne ratiweién:te nikentiohkò:ten. Enhotiié:nawa’se tóka’ iekaié:ri nenhotihwistaién:ta’ne ne iontatéhnha’s táhnon iontatio’tenhserá:wis rotiio’ténhstha. Tóka’ aionteweienhstà:na tóka’ aiakoió’ten tsi ieweientéhta’s, ronatià:tare rotiwennò:ron tsi niiorihowá:nen ahshakonate’shennaiénhahse ahontéweienhste ne ratirihowanáhtha; né:’e ò:ni kaienawà:se ahontonkwe’tará:ko rotiio’ténion. Ronatià:tare rotiwennò:ron tsi e’thóhtsi enwá:ton aiakoió’ten táhnon aiontéweienhste tsi nikanakerahserá:’a, iah kwah nek ne tsi kanatowá:nens.
Enhatitiohkwakétsko tahonwatiwén:nahkwe ne Onkwehón:we ratirihowanáhtha: Thóha akwé:kon wahatirihwanòn:we’ne tsi kwah í:ken tsi tehonatonhwentsió:ni ahatitiohkwakétsko tahonwatiwén:nahkwe ne Onkwehón:we ratirihowanáhtha tsi náhe shakonate’shenná:wi, shakona’sharì:ne táhnon shakotihretsiá:rons. Ótia’ke ronatià:tare wahonhtsiá:ton tsi eh nikentiohkò:ten e’thóhtsi skanakerahserátshon tahonwatiwennáhkwenke. Ronatià:tare wahonthró:ri tsi ronnentón:nis ne ratirihowanáhtha rotiio’ténion ne í:non aonhá:’ok kanakerahserá:ien, táhnon tsi na’teiotonhwentsióhon tahontaththárhahse táhnon tahontaterihónnien. Tsi niiorihowá:nen aonte’shennaién:take ahshakotiwennaníhara’ne Onkwehón:we kentiohkwa’shón:’a ó:ia thiionhwentsiaténion nithoné:non né:’e ò:ni rotiwennò:ron. Ohwísta tenhonatonhwéntsiohse tetsiá:ron ahonhténtia’te táhnon ahonterihwahsterísthake ne eh nikentiohkò:ten.
Ahonón:ni ne ionterihwaweien’tónhkwa táhnon iokaión:’on iehiatonhseraientáhkwa: Ronatià:tare wahón:nehre tsi ionterihwaweien’tónhkwa né:’e teiotonhwentsióhon ne akarihwahní:rate tsi Onkwehón:we táhnon iah tehononkwehón:we enwá:ton ahatitshén:ri, ahonteweièn:ton táhnon á:hontste ne Onkwehón:we raotirén:na, teióiaks táhnon tkaia’tárha okara’shón:’a. Wahatiierón:nitste tsi nia’té:kon kaió’tats aietshén:ri ne iokaión:’on teióia’ks kà:nheks táhnon karennaráhston, táhnon wahonthró:ri tsi na’teiotonhwentsióhon iontstáhkwa ahotiién:take ahonteweièn:ton ne Onkwehón:we ronón:ni, ne kwah nó:nen rontá:ti tóka’ni ronterennótha Onkwehonwehnéha. Ahse’kén raonaterien’tara’tsheraká:ion nek ne enwá:ton raotinakerahserá:kon tahatikháhsi, tká:konte akaianerenhseraién:take akanónhstate nahò:ten wateweièn:ton.
CBC ronaterihwaién:ni, táhnon tsi tenhatiié:na ne CBC: Ronatià:tare rotiwennò:ron tsi CBC North, né:ne ia’tekaiéhstha ne Onkwehón:we raotikara’shón:’a, enwá:ton tahonwatina’ké:ron ne akwé:kon CBC tkaia’tárha táhnon waterennótha tkanonhsó:ton. Thonéhton wahatiién:tere’ne tsi ate’shén:naien enwatena’tón:ni ne Onkwehón:we ronón:ni CBC Gem nón:we nek tsi rotiwennò:ron tsi ótia’ke Onkwehón:we kanakeráhsera iah thaón:ton karonwarà:ke ahotiia’takehnha’tsheraién:ta’ne. Ótia’ke wahatihthá:rahkwe tsi niwentó:re ne CBC tahón:nehkwe ne raotiio’ténhsera, ne kwah ne tkaia’tárha, táhnon wahón:nehre tsi e’thóhtsi sénha enwate’shennaién:take tahatikháhsi nahò:ten ronón:ni tsi na’tekiátere ne CBC táhnon Onkwehón:we ratirihowanáhtha. Ahse’kén CBC rotihwistaién:ta’s thiionkwe’taténion raotihwísta ne ahontathá:wi, ronatià:tare wahón:nehre tsi e’thóhtsi sénha é:so Onkwehón:we ahatiia’tá:rake tsi tkaia’tárha táhnon sénha é:so Onkwehón:we ahotiió’tenske ne thon’sharí:nes nikaio’tenhserò:tens. Ne akaié:nawa’se ken’ naiá:wen, ronatià:tare rotiwennò:ron tsi CBC enwá:ton ahshakotiio’ténhseron ne Onkwehón:we thoti’nikonhratihénthwen ahotiió’ten tsi thatirihowanáhtha.
Kanerahsera’shón:’a né:ne raoná:wen se’ rotiianerenhserá:ien, rotinónhsaien, rotihwístaien: Ótia’ke Onkwehón:we kanakerahserá:ien wahatiianerenhserakwatá:ko ne ratirihowanáhtha aorihwà:ke, kanonhsó:ton táhnon ohwísta, táhnon wahón:nehre tsi e’thóhtsi akaienteré:’on tsi raotinakeráhsera tehonatonhwentsió:ni ahontatkó:rahste táhnon ahontathá:wi, ne ò:ni ne ratirihowanáhtha kaianerénhsera aorihwà:ke.
Tsi niiorihowá:nen ne sénha é:so ia’thatí:ieste táhnon tensewathna’netárion tsi shakotihwistá:wis né:’e wahatinà:ton tsi kwah iorihowá:nen ne aonsakakwatá:ko ne nahò:ten rotiwennò:ron tsi nikarì:wes katsiénhaien.
Ronatià:tare wahonhtsiá:ton tsi sénha é:so ohwísta tehonatonhwentsió:ni ne akaié:nawa’se nahò:ten tehonatonhwentsió:ni ne Onkwehón:we ratirihowanáhtha táhnon nia’té:kon ronón:ni, táhnon aonsakakwatá:ko tsi iah sha’tékena tekénhne tsi ní:kon shakotihwistá:wis Onkwehón:we ratirihowanáhtha tsi ní:ioht ne kahionhakwe’ní:io ratirihowanáhtha. Wa’akwarihwà:ronke tsi ohwísta tehonatonhwentsió:ni ahshakotiweiénhsten, ahshakotínha’ne táhnon ahshakotihretsiá:ron ne Onkwehón:we ratirihowanáhtha, nia’té:kon ronón:ni táhnon rotiio’ténion, ne akaié:nawa’se tsi kakarótha tsi í:non ie’tehontawenriéhshas, ne iontstáhkwase ahatihní:non, ahatinonhsakétsko táhnon tahatíhsnie’ne, ne akahretsiá:ron sha’tehonátte tsi rotirihwá:wi á:hontste ne iehtharáhkwa nikaia’takehnha’tsherò:tens táhnon akahretsiá:ron tsi Onkwehonwehnéha rontewennontáhkwa ne karihwanákere.
Tsi náhe wahatiién:tere’ne tsi kí:ken iah tehotiianerenhserá:ien ne CRTC aonsahatikwatá:ko, ronatià:tare rotiwennò:ron tsi iah tewatehià:ron ne Northern Aboriginal Broadcasting raotihwísta ne 30 niiohserá:ke nikarì:wes táhnon tsi sha’tekentiokò:ten shakotihwistá:wis. Wa’akwarihwà:ronke tsi karihwakátste nok iorihwató:ken ohwísta tehonatonhwentsió:ni, ne iá:wet ne ken’nikarihwéhshas nikaion’tenhserà:sas nikahwistò:tens, ne káti enwá:ton ahatikwatá:ko ahontate’shén:non raotinakerahserá:kon. É:so wahati’nikòn:ron tsi e’thóhtsi CRTC ahatikwatá:ko tsi aioterihwíson ahonwatihwíhston ne akaié:nawa’se tsi iah sha’tékena té:ken. Wahatiierón:nitste tsi Onkwehón:we ratirihowanáhtha táhnon nia’té:kon ronón:ni e’thóhtsi ahonanitskwahra’tsheraién:take atekhwahráhne tsi nón:we ohwísta ronterihwahsteríhstha.
Ahse’kén wa’kèn:re ne ohwísta táhnon karì:wes ronatienawáhstha ahatirì:wenhte, ótia’ke wahati’nikòn:ron tsi karihwarò:ron akakwatákwenke tsi nitiawé:non nohwísta táhnon ahshakotiia’takehnhà:tsheron ahotiié:nawa’se aontatshennínion’te. Ne ò:ni wa’akwarihwà:ronke tsi nahò:ten teiotonhwentsiohónhkwa naiakoríhon nontaiakohwihstaién:ta’ne ne kahionhakwe’ní:io shakotihwistá:wis iah tekarihwanòn:we’s tsi ní:ioht tsi rononnhétie ne Onkwehón:we.
Ronatià:tare wahatiierón:nitste tsi na’teiotonhwentsióhon ne CRTC ia’tahshakononkwè:taiehste ne Onkwehón:we raotitióhkwakon, ne káti sénha tahotirihwaienawà:konke ne Onkwehón:we ratirihowanáhtha táhnon nia’té:kon ronón:nis, táhnon aonsahatiianerenhserakwatá:ko ne akarihwahní:rate tsi tkaié:ri tsi ní:ioht tsi tehonwatina’ké:rons ne Onkwehón:we.
Sénha ia’teiorihoserá:ton, ronatià:tare iehonahtsiá:ton tsi CRTC e’thóhtsi sénha é:so nihá:ti Onkwehón:we ahshakotínha’ne táhnon orihwí:io ahonón:ni tsi Commission rotiio’ténion enhontéweienhste ne tsi niiakorihò:ten aie’nikòn:raren kaweienhstà:tshera. Ronatià:tare wahón:nehre tsi Onkwehón:we kentióhkwa akakwatákwenke skátne ne CRTC ne akaié:nawa’se tsi tehontaththarén:ni táhnon ahotiríhon sénha watié:sen ahatirihwatshenrión:ko táhnon ahotinenhrì:ne nó:nen teiotonhwentsióhon. Wahón:nehre tsi kaianerénhsera e’thóhtsi enwatié:sen’ne táhnon sénha aioia’tahkariióhake, táhnon tsi CRTC e’thóhtsi kató:ken tsi na’teká:ron ahshakotihthárhahse ne Onkwehón:we kanakeráhsera táhnon kentiohkwa’shón:’a.
Ronatià:tare wahatiierón:nitste tsi Onkwehón:we ratirihowanáhtha kaianerenhserá:se e’thóhtsi akarihwakweniénhstonke táhnon ahatiia’tarátie akwé:kon Onkwehón:we. E’thóhtsi akontikwé:konke ne tsi ní:ioht tsi tekaia’toréhtha orihwawì:tshera táhnon nahò:ten Onkwehón:we ronón:ni. Akwé:kon skarì:wa wahón:ton tsi CRTC raotiianerénhsera e’thóhtsi taiottenionke tho akarátie tsi enwatena’tón:ni táhnon enhshakotihretsiá:ron Onkwehón:we né:ne ronón:nis. Ronatià:tare ne ò:ni wahatiierón:nitste tsi niiorihowá:nen aiontéweienhste nahò:ten tekiatátenonhkwe ne ratirihowanáhtha ronaterihwaién:ni tsi katshénrion tsi kahiatonhseríhson kwah né:ne Truth and Reconciliation Commission táhnon ne National Inquiry into Missing and Murdered Indigenous Women and Girls nó:nen rotikwatakwenhátie ne Onkwehón:we ratirihowanáhtha kaianerenhserá:se.
Ronatià:tare wa’thatikháhsi tsi ní:ioht ia’tehatiká:nere ne nia’té:kon ó:ia nahò:ten rotihtharáhkwen, tho akarátie ótia’ke né:ne iah tehotiianerenhserá:ien ne CRTC tóka’ni tsi ní:ioht nakaié:ren ne tahatiié:na ahatíhsa ne Onkwehón:we ratirihowanáhtha kaianerenhserá:se. Commission rón:nehre tahshakotinonhwerá:ton akwé:kon ronatià:tare tsi wahati’nikòn:ron táhnon ahshakotihró:ri tsi akwé:kon nahò:ten ronatewennatkà:wen né:’e wahatiierón:nitste, ne ki’ shé:kon tóka’ iah tekahiá:ton kí:ken kakarókeri.