ᐋᑐᐋ, 21 ᕕᕗᐊᕆ 2023
ᖃᕋᓴᐅᔭᒃᑯᑦ
ᑭᕙᓐ ᑲᑉᓗᑦᓯᐊᖅ, ᐃᕙᓗᐊᕐᔪᒃ ᒥᐅᕆᑦ ᐊᒻᒪᓗ ᔪᐊᑕᓐ ᐋᕆᐊᖅ
ᓄᓇᕗᑦ ᑐᙵᕕᒃᑯᑦ
ᑎᑎᖅᑲᕐᓂᐊᕐᕕᐊ 638
ᐃᖃᓗᐃᑦ, ᓄᓇᕗᑦ X0A 0H0
ᐅᖃᐅᓯᐅᔪᑦ: ᐃᖅᑲᓇᐃᔭᖅᑎᓄᑦ ᑎᑎᖅᑲᖅ - ᐅᖄᓚᐅᑎᓄᑦ ᐊᖅᑯᑎᒃᑯᑦ - ᕿᓂᖅᑐᑦ ᐃᓱᒪᒋᔭᐅᔪᓂᒃ ᒥᑦᓵᓄᑦ ᐊᒃᕕᐊᕈᑎᐅᔪᓂᒃ ᐃᓚᐅᖃᑕᐅᓂᕐᒧᑦ ᑭᓪᓕᓯᓂᐊᖅᑎᒃᑯᑦ ᑲᒪᒐᓱᐊᖅᑎᓪᓗᒋᑦ
ᐃᓄᐃᑦ ᐅᖃᖅᑕᖏᑦ ᐱᒻᒪᕆᐅᕗᑦ ᑕᒪᑐᒧᖓ ᐅᖃᖃᑎᒌᓐᓂᐅᔪᒧᑦ ᒥᑦᓵᓅᖓᔪᓂᒃ ᑐᓴᖃᑦᑕᐅᑎᓂᕐᒧᑦ ᐱᔨᑦᓯᕋᐅᑎᓄᑦ ᖁᑦᓯᑦᑐᒥᐅᑦ ᐅᑭᐅᖅᑕᖅᑐᒥᐅᑕᓄᑦ, ᐱᓗᐊᖅᑐᒥ ᑕᒪᒃᑯᐊ ᐋᓯᑯᑎᓲᑎᐅᕙᑦᑐᑦ ᑭᖑᓂᐊᒍᑦ ᐅᖃᖃᑎᒌᑦᑐᖃᓚᐅᖅᑎᓪᓗᒍ ᐊᑦᑐᐃᓂᖃᕐᓂᐅᓴᒻᒪᑕ ᓄᓇᓕᓐᓂᒃ. ᐅᕙᒍᑦ ᑎᑎᕋᓕᖅᑯᒍᑦ ᐃᓕᓐᓄᑦ ᐅᓪᓗᒥ ᖃᐅᔨᑎᑦᓯᒍᒪᑦᓱᑕ ᐃᓱᒪᖃᕐᕕᖃᕆᐊᑦᓴᑦᑕ ᐃᓕᑉᐹᓪᓕᕈᒪᓂᕐᒥᒃ ᐃᓕᑦᓯ ᐃᓅᓯᑦᓯᓐᓂᒃ ᖃᐅᔨᓯᒪᔭᑦᓯᓐᓂ, ᖃᓄᕐᓗ ᑕᐅᑐᑦᑕᖃᕋᓱᐊᕐᒪᖔᑦᓯ ᐊᒻᒪᓗ ᑐᑭᓯᒪᔭᑦᓯᓐᓂᒃ, ᐊᒻᒪᓗ ᖃᓄᖅ ᐱᕕᖃᖅᑎᑦᓯᒍᓐᓇᕐᒪᖔᑦᑕ ᐃᓚᐅᖃᑕᐅᖁᓪᓗᒋᑦ ᐃᓄᓐᓄᑦ ᐊᖏᖃᑎᒌᓐᓂᒃᑯᑦ ᐊᐅᓚᑕᐅᔪᖁᑎᐅᔪᑦ ᑕᒪᒃᑯᓇᓂ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒧᑦ ᑭᓪᓕᓯᓂᐊᖅᑎᑯᑦ ᑲᒪᖃᑦᑕᑎᓪᓗᒋᑦ.
ᑲᓇᑕᒥ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒧᑦ ᑭᓪᓕᓯᓂᐊᖅᑎᒃᑯᑦ ᕿᓂᖅᑯᑦ ᐱᐅᓯᕙᓪᓕᐊᑎᑦᒍᑎᑦᓴᓂᒃ ᖃᕆᓴᐅᔭᒃᑰᕈᑎᐅᔪᓂᒃ ᐊᒻᒪᓗ ᐅᖄᓚᐅᑎᓄᑦ ᐱᔨᑦᓯᕋᐅᑎᓂᒃ ᓄᓇᓕᖏᓐᓂ ᖁᑦᓯᑦᑐᒥ ᐅᑭᐅᖅᑕᖅᑐᖓᓂ, ᐊᒻᒪᓗ ᑕᐃᒪᐃᓐᓂᖓᓄᑦ ᐱᒋᐊᖅᑎᑦᓯᓯᒪᕗᑦ ᖃᐅᔨᒃᑲᐃᒍᑎᓂᒃ ᐅᖃᐅᓯᖃᕈᒪᔪᓂᒃ ᑐᓴᖅᑕᐅᖁᔭᐅᔪᓂᒃ - ᑐᓴᖃᑦᑕᐅᑎᓕᓂᕆᕐᒨᖓᔪᓂᒃ ᖁᑦᓯᑦᑐᒥᐅᑕᓄᑦ ᐅᑭᐅᖅᑕᖅᑐᒥ, ᑐᓴᕐᕕᖃᕋᓱᐊᕐᓂᖅ ᐊᐃᑉᐱᖅᑐᖅ (ᑎᓕᑳᒻᑯᑦ ᖃᐅᔨᒃᑲᐃᒍᑎᖓᑦ ᐅᖃᖃᑎᒌᓐᓇᖃᕐᓇᖃᕆᐊᒥ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒨᖓᔪᓂᒃ ᑭᓪᓕᓯᓂᐊᖅᑎᑯᓐᓂᒃ 2022-147). ᐊᑏ ᑕᑯᒋᐊᕈᒃ ᐅᖃᖃᑎᒌᓐᓂᕐᒨᖓᔪᓂᒃ ᖃᕆᓴᐅᔭᒃᑯᑦ ᑐᑭᓯᒋᐊᕐᕕᒃ ᑐᑭᓯᑎᑦᓯᔪᖅ ᑭᖑᓪᓕᖅᐹᒥ ᖃᐅᔨᒃᑲᐅᑎᒥᓂᐅᔪᓂᒃ ᐃᓕᓐᓄᑦ ᒥᑦᓵᓄᑦ ᑕᒪᑦᓱᒪ ᑲᒪᒋᔭᐅᕙᓪᓕᐊᔫᑉ.
ᑕᒪᓐᓇ ᑲᒪᒋᔭᐅᓂᐊᖅᑐᖅ ᑐᑭᖃᕋᓱᐊᖅᑐᖅ ᖃᐅᔨᒐᓱᐊᕐᓂᕐᒥᒃ ᐋᖅᑭᑦᓲᑎᐅᒍᓐᓇᖅᑐᓂᒃ ᐱᒋᐊᓪᓚᑲᓐᓂᖁᓪᓗᒋᑦ ᐱᕕᖃᖅᑎᑦᓯᒍᑎᐅᒃᑲᓐᓂᕈᓐᓇᖅᑐᓂᒃ ᐃᓕᓐᓂᐊᕈᑎᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᐅᒍᓐᓇᖅᑐᓂᒃ ᑕᑉᐹᓂ ᖁᑦᓯᑦᑑᑉ ᐅᑭᐅᖅᑕᖅᑐᖓᓂ ᑕᒪᒃᑯᐊ ᐱᒋᐊᖃᕐᖓᑕ ᐊᑭᑐᓗᐊᓐᖏᑦᑐᓂᒃ, ᓈᒻᒪᓯᐊᖅᑐᓂᒃ ᖃᕆᓴᐅᔭᒃᑯᑦ ᐱᔨᑦᓯᕋᐅᑎᓂᒃ. ᑕᒪᒃᑯᐊ ᐃᓚᒍᑦᓯᐅᓪᔨᕗᑦ ᐋᖅᑭᑦᓲᑎᑦᓴᓂᒃ ᐃᑲᔪᖅᓯᒍᓐᓇᖅᑐᓂᒃ ᐱᐅᓕᑦᓯᓯᒪᓂᕐᒥᒃ, ᓴᓇᒋᐊᕆᓂᕐᒥᒃ ᐊᒻᒪᓗ ᓯᐊᒻᒪᖅᑎᕆᖃᑦᑕᓂᕐᒥ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᓪᓗ ᑕᒪᒃᑯᐊ ᐱᐅᓯᕚᓪᓕᖅᑕᐅᓗᑎᒃ ᐊᑐᖅᑕᐅᓯᒍᓐᓇᕐᓂᖏᑦ ᐊᑭᑐᓗᐊᓐᖏᓪᓗᑎᒃ, ᑕᑎᒋᒐᑦᓴᐅᓯᐊᕐᓗᑎᒃ, ᐊᒻᒪᓗ ᐱᐅᑦᓯᐊᖅᑐᓂᒃ ᖃᕆᓴᐅᔭᒃᑯᑦ ᐱᔨᑦᓯᕋᖅᑕᐅᓗᑎᒃ.
ᑐᓐᖓᕕᒋᔭᐅᓪᓗᓂ ᐅᖃᐅᓯᕆᔭᐅᓯᒪᔪᑦ ᓯᕗᓪᓕᖅᐹᒥ ᑐᓴᕋᓱᐊᖅᑐᖃᖅᑎᓪᓗᒍ ᒥᑦᓵᓄᑦ ᖁᑦᓯᑦᑑᑉ ᐅᑭᐅᖅᑕᖅᑐᖓᓂ ᑲᒪᔪᖃᖅᑎᓪᓗᒍ, ᑖᒃᑯᐊ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒧᑦ ᑭᓪᓕᓯᓂᐊᖅᑎᑯᑦ ᐃᓚᒍᑦᓯᐅᔾᔨᓯᒪᕗᑦ ᐱᕕᖃᖅᑎᑦᓯᒐᓱᐊᖅᑯᑦ ᐃᓗᐊᓂ ᑐᓴᕐᕕᖃᕋᓱᐊᕐᓂᐅᑉ ᐊᐃᑉᐱᖅᑐᒥ ᑕᒪᒃᑯᐊ ᐱᕕᖃᖁᓪᓗᒋᑦ ᐊᒥᓲᓂᖅᓴᐃᑦ ᑐᓴᖅᑎᑦᓯᒍᒪᔪᑦ. ᑐᓐᖓᓱᑦᑎᑦᓯᕗᒍᑦ ᐃᒃᕕᑦ ᐃᓱᒪᒋᔭᖏᓐᓂᒃ ᖃᓄᖅ ᐅᕙᒍᑦ ᑐᓴᕐᕕᖃᕋᓱᐊᕈᓯᒋᕙᑦᑕᑎᓐᓂᒃ ᐊᑲᐅᓈᖅᓯᒪᒃᑲᓐᓂᕈᓐᓇᕐᒪᖓᖅ, ᐊᒻᒪᓗᑦᑕᐅᖅ ᓇᓗᓇᐃᖅᓯᔪᖃᕈᓐᓇᕐᓗᓂ ᐊᒃᕕᐊᕈᑎᐅᕙᑦᑐᓂᒃ ᑕᒪᒃᑯᓂᖓ ᓄᖅᑲᑎᑦᓯᒍᑎᐅᕙᑦᑐᓂᒃ ᐃᓚᐅᖃᑕᐅᒍᒪᔫᒐᓗᐊᓂᒃ 1 . ᑐᓐᖓᓱᑦᑎᑦᓯᕗᒍᑦ ᐃᓘᓇᖏᓐᓂᑦ ᑐᓴᖅᑎᑦᓯᒍᑎᐅᒍᒪᔪᓂᒃ ᐃᓕᑦᓯ ᑐᓴᐅᒪᔭᐅᖁᔭᖏᓐᓂᒃ. ᐃᓚᓕᐅᑎᓗᒋᑦ, ᐊᑐᐃᓐᓇᐅᑎᑦᓯᕗᒍᑦ ᐅᑯᓂᖓ ᐊᐱᖅᑯᑎᐅᔪᓂᒃ ᐃᒃᕕᑦ ᐃᓱᒪᑦᓴᖅᓯᐅᕈᑎᒋᒍᓐᓇᑕᓐᓂᒃ ᐱᒋᐊᖁᓪᓗᒍ ᐅᖃᖃᑎᒌᓐᓂᐅᔪᖅ.
ᖁᔭᓐᓇᒦᒃ ᐃᓱᒪᖃᕐᕕᖃᖅᓯᒪᒐᕕᑦ ᐃᑲᔪᖅᓯᒪᓂᕆᔭᓐᓄᑦ ᐅᕙᑦᑎᓐᓂᒃ ᑕᒪᑐᒧᖓ ᐊᑦᑐᐊᔪᓄᑦ. ᐊᖏᔪᕐᔪᐊᒥᒃ ᖁᒃᕙᖅᑎᖅᓯᒪᓪᓚᕆᑉᐸᕗᑦ ᓇᓗᓇᐃᖅᓯᒍᓐᓇᕈᕕᑦ ᖃᓄᐃᓕᖓᓛᕐᒪᖔᖅᐱᑦ ᐅᖃᖃᑎᒌᓐᓂᐅᓚᖓᔪᒥ ᕿᓚᒥᐅᓂᖅᐹᒃᑯᑦ, ᖃᕆᓴᐅᔭᒃᑯᑦ ᑐᓴᖃᑦᑕᐅᑎᒍᑎᑎᒍᑦ, ᐅᒃᕙᓗ ᑎᑎᖅᑲᑎᒍᑦ.
ᐊᑏ ᖃᐅᔨᒪᓂᐊᖅᑯᑎᑦ, ᐃᓕᓐᓄᑦ ᐊᐅᓪᓚᑎᑦᓯᓛᕋᑦᑕ ᐸᐃᑉᐹᒨᖅᓯᒪᔪᓂᒃ ᐊᒥᓱᓕᐅᖅᓯᒪᔪᓂᒃ ᑕᒪᑐᒪ ᒥᒃᓵᓄᑦ ᑎᑎᖅᑲᐅᑉ.
ᑎᑎᕋᖅᑐᖅ,
ᓯᕗᓪᓕᖅ ᑎᑎᕋᖅᑕᐅᓯᒪᔪᖅ ᐊᑎᓕᐅᖅᑕᐅᓯᒪᕗᖅ
ᒫᑎᐅ ᑐᓵᔾ
ᐊᖏᔪᖅᑳᖅ, ᐸᕐᓇᐃᓂᕐᒧᑦ ᖃᐅᔨᒐᓱᐊᕐᕕᒃ ᐊᒻᒪᓗ ᑐᓴᖅᑎᑦᓯᖃᑦᑕᓕᕆᓂᕐᒧᑦ, ᑐᓴᖃᑦᑕᐅᑎᓕᕆᓂᕐᓗ
ᑲᓇᑕᒥ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒧᑦ ᑭᓪᓕᓯᓂᐊᖅᑎᒃᑯᑦ
Matthew.Tosaj@crtc.gc.ca
ᐅᖄᓚᐅᑎᖓ: 613-878-6887
ᐊᔾᔨᖓᓂᒃ ᐱᔪᖅ: ᓯᐅᕕ ᓚᑉᐱ, CRTC, Sylvie.Labbe@crtc.gc.ca
ᐊᓇᔅᑕᐃᓯᐊ ᒎᓪᑎ, CRTC, Anastasia.Gould@crtc.gc.ca
ᑕᒪᓐᓇ ᖃᐅᔨᒪᖃᑎᒌᒐᓱᐊᕐᓂᐅᔪᖅ ᑐᑭᖃᖅᑯᖅ ᖃᐅᒪᑎᑦᓯᒐᓱᐊᕐᓂᕐᒥ ᐃᖅᓇᐃᔭᖅᑎᓂᒃ ᒥᑦᓵᓄᑦ ᐊᒃᕕᐊᕈᑎᐅᕙᑦᑐᓂᒃ ᐃᓚᐅᖃᑕᐅᒍᒪᔫᒐᓗᐊᓂᒃ ᑐᓴᕋᓱᐊᖅᑐᖃᖅᑎᓪᓗᒍ. ᑕᒪᓐᓇᐅᓕᖅᑎᓪᓗᒍ ᐃᖏᕐᕋᓂᕆᔭᖓ, ᐅᓇ ᑎᑎᖅᑲᖅ ᐊᒻᒪᓗ ᑭᖑᓂᐊᒍᑦ ᖃᐅᔨᒪᖃᑦᑕᐅᑎᓂᕆᔭᕗᑦ ᐊᑦᑐᐊᔪᓂᒃ ᑕᒪᑦᓱᒧᖓ ᐃᓚᓕᐅᔾᔭᐅᓐᖏᓚᑦ ᑎᑎᕋᖅᑕᐅᔪᓄᑦ ᑕᒃᑯᓄᖓ ᑎᓕᑳᒻᑯᑦ ᖃᐅᔨᒃᑲᐃᒍᑎᖏᓐᓄᑦ ᐅᖃᖃᑎᒌᓐᓂᕐᒨᖓᔪᓂᒃ ᑲᓇᑕᒥ ᓈᓚᐅᑎᒃᑰᐸᑦᑐᓂᒃ ᑕᓚᕖᓴᒃᑯᐸᑦᑐᓂᓪᓗ ᐊᒻᒪᓗ ᑐᓴᖃᑦᑕᐅᑎᒍᑎᓕᕆᓂᕐᒧᑦ ᑭᓪᓕᓯᓂᐊᖅᑎᑯᑦ 2022 - 147 ᑲᒪᒋᔭᐅᓂᕆᓂᐊᖅᑕᖓᑕ.