ᓇᐃᒡᓕᒋᐊᖅᓯᒪᔪᖅ

ᐅᑯᑎᒎᓇᖅᓂᐅᕕᖅᐸᒃᑐᓄᑦ ᓴᐳᔾᔨᓯᒪᓂᕐᒧᑦ ᖃᓄᐃᓕᐅᕐᓂᕐᒧᑦ ᐱᕙᒌᔭᖅᑕᐅᓯᒪᔪᖅ, ᑲᑎᒪᔩᑦ ᐱᓕᕆᐊᖃᖅᐳᑦ ᐃᑲᔪᕈᒪᓪᓗᑎᒃ ᓴᐳᔾᔨᓯᒪᓂᕐᒥᒃ ᓴᙱᓂᖅᑖᖅᑎᑦᑎᓂᕐᒥᒡᓗ ᑲᓇᑕᒥᐅᓂᒃ ᐱᓕᕆᐊᖃᖅᐸᖕᓂᖏᓐᓄᑦ ᐃᑭᐊᖅᑭᕕᖕᒥᒃ, ᓴᕕᒐᐅᔭᖃᙱᑦᑐᓂᒃ ᐅᖄᓚᐅᑎᓂᒃ, ᐊᖏᕐᕋᕆᔭᐅᔪᓂ ᐅᖄᓚᐅᑎᓂᒃ, ᑕᓚᕖᓴᓂᒡᓗ (ᐊᑕᐅᑦᑎᒃᑰᖅᑕᐅᓪᓗᑎᒃ, ᑐᓴᐅᒪᑎᑦᑎᓂᕐᒧᑦ) ᐱᔨᑦᑎᕋᕐᕕᖃᖅᐸᒃᑐᓄᑦ.

ᐃᒥᐊᓗᓕᕆᔨᕐᔪᐊᒃᑯᑦ ᒫᓐᓇ ᑎᓴᒪᓂᒃ ᓂᐅᕕᖅᐸᒃᑐᓄᑦ ᐃᓕᖅᑯᓯᑦᑎᐊᕆᒋᐊᖃᕐᓂᕐᒧᑦ ᒪᓕᒋᐊᓕᖃᖅᐳᑦ ᐃᑲᔪᕈᒪᓪᓗᑎᒃ ᑕᓯᐅᖅᓯᓂᕐᒥᒃ ᐱᓕᕆᖃᑎᒌᒃᐸᖕᓂᕆᔭᐅᔪᓂᒃ ᐱᑎᑦᑎᕙᒃᑐᓄᑦ ᑐᓴᐅᒪᑎᑦᑎᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᐊᑐᖅᑎᒋᔭᖏᓐᓄᓪᓗ. ᑖᒃᑯᐊ ᓇᓗᓇᐃᒃᑯᑕᑦ ᐊᑐᖅᐳᑦ ᐊᖏᕐᕋᕆᔭᐅᔪᓂ ᐅᖄᓚᐅᑎᓄᑦ ᐱᔨᑦᑎᕋᐅᑎᓄᑦ (ᑮᓇᐅᔭᒃᑯᕕᖕᒧᐊᖅᓯᓂᖅ ᓇᑲᑕᐅᓂᕐᒧᓪᓗ ᓇᓗᓇᐃᒃᑯᑕᖅ), ᓴᕕᒐᐅᔭᖃᙱᑦᑐᓄᑦ ᐅᖄᓚᐅᑎᓄᑦ ᐱᔨᑦᑎᕋᐅᑎᓄᑦ (ᓴᕕᒐᐅᔭᖃᙱᑦᑐᓄᑦ ᓇᓗᓇᐃᒃᑯᑕᖅ), ᑕᓚᕖᓴᒃᑯᑦ ᐱᔨᑦᑎᕋᐅᑎᓄᑦ, ᓲᕐᓗ ᑕᓚᕖᓴᓄᑦ ᐱᔨᑦᑎᕋᐅᑎᓄᑦ (ᑕᓚᕖᓴᒃᑯᑦ ᐱᔨᑦᑎᕋᕐᓂᕐᒧᑦ ᓇᓗᓇᐃᒃᑯᑕᖅ), ᐊᒻᒪ ᐃᑭᐊᖅᑭᕕᒃᑯᑦ ᐱᔨᑦᑎᕋᐅᑎᑦ (ᐃᑭᐊᖅᑭᕕᒃᑯᑦ ᓇᓗᓇᐃᒃᑯᑕᖅ) [ᐊᑕᐅᑦᑎᒃᑰᖅᑕᐅᓪᓗᑎᒃ, ᓇᓗᓇᐃᒃᑯᑕᑦ]. ᑲᑎᒪᔩᑦ ᐅᓐᓂᕐᓘᑎᓄᑦ ᐅᖄᓚᐅᓯᕆᔨᒃᑯᑦ-ᑕᓚᕖᓴᒃᑯᑦ ᐱᔨᑦᑎᕋᐅᑎᑦ ᑎᒥᖁᑖ (CCTS) ᐊᐅᓚᑦᑎᕙᒃᐳᑦ ᐊᑐᖅᐸᒃᖢᑎᒡᓗ ᓇᓗᓇᐃᒃᑯᑕᕐᓂᒃ ᐃᑲᔪᕈᒪᓪᓗᑎᒃ ᐋᖅᑭᒃᓯᒪᓕᖅᑎᑦᑎᓂᕐᒥᒃ ᐊᑐᖅᑎᐅᕙᒃᑐᑦ ᐅᖃᐱᓘᑎᖏᓐᓂᒃ.

ᑖᒃᑯᐊ ᓇᓗᓇᐃᒃᑯᑕᐃᑦ ᐃᑲᔪᖅᐸᒃᐳᑦ ᑲᓇᑕᒥᐅᓂᒃ ᐱᑎᑕᐅᙱᖦᖢᑎᒃ ᓂᕆᐅᓇᙱᑦᑐᒃᑯᑦ ᐊᑭᑦᑐᕆᐊᖅᑐᓂᒃ ᑕᖅᑭᑕᒫᑦ ᐊᑭᓕᒐᒃᓴᓂᒃ, ᑕᐃᔭᐅᕙᒃᑭᓪᓗᓂ ᐊᑭᓕᒐᒃᓴᓄᑦ ᖁᐊᖅᓵᕐᓇᖅᑐᑦ, ᐊᔪᕐᓇᙱᓐᓂᖅᓴᐅᑎᑦᑎᓪᓗᓂᓗ ᐊᑐᖅᑎᐅᕙᒃᑐᓄᑦ ᑐᑭᓯᐅᒪᓂᕐᒥᒃ ᐱᔨᑦᑎᕋᕐᕕᖃᕐᓂᕐᒧᑦ ᑳᓐᑐᓛᒋᔭᒥᓂᒃ ᐊᓯᔾᔨᖅᓯᓂᕐᒥᒡᓗ ᐱᑎᑦᑎᕙᒃᑐᓂᒃ. ᐃᒥᐊᓗᓕᕆᔨᕐᔪᐊᒃᑯᑦ ᖃᐅᔨᓴᖅᐸᓪᓕᐊᔭᖏᑦ ᑕᑯᑎᑦᑎᓯᒪᕗᑦ ᓇᓗᓇᐃᒃᑯᑕᑦ ᐃᑲᔪᖅᓯᒪᓂᖏᓐᓂᒃ ᐱᐅᓯᒋᐊᖅᑎᑦᑎᓂᕐᒥᒃ ᓂᐅᕕᖅᐸᒃᑐᓄᑦ ᐊᑐᖅᐸᒃᑕᖏᓐᓂᒃ ᐱᔨᑦᑎᕋᖅᑎᓄᑦ. ᑭᓯᐊᓂᓗᑦᑕᐅᖅ, ᑕᒪᒃᑯᐊ ᒪᓕᒃᑕᐅᔭᕆᐊᓖᑦ ᐃᓕᐅᖅᑲᖅᑕᐅᓚᐅᕐᓂᖏᓐᓄᑦ ᐊᔾᔨᒌᙱᑦᑑᑎᒃᑯᑦ ᖃᖓᒃᑰᕐᓂᖏᑎᒍᑦ ᐊᔾᔨᒌᙱᑦᑐᒃᑯᓪᓗ ᐃᓗᓕᖏᑎᒍᑦ, ᓂᐅᕕᖅᐸᒃᑐᓄᑦ ᓴᐳᔾᔨᓯᒪᓃᑦ ᐊᑕᐅᓰᓐᓇᒃᑰᖅᐸᙱᓚᑦ ᑕᒪᒃᑯᓇᓂ ᑐᓴᐅᒪᑎᑦᑎᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓂ, ᐃᒪᐃᒃᑲᓗᐊᖅᑎᓪᓗᒍ, ᐊᒥᓱᑦ ᑲᓇᑕᒥᐅᑦ ᓂᐅᕕᖅᐸᒃᑲᓗᐊᖅᑎᓪᓗᒋᑦ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑲᑎᙵᓪᓗᑎᒃ. ᑕᒪᓐᓇ ᓇᓗᓕᕈᑕᐅᔪᓐᓇᖅᐳᖅ ᐊᑭᓕᖅᓱᐃᔨᓄᑦ ᐊᒻᒪ ᐊᒡᓚᕝᕕᓕᕆᔾᔪᑎᓄᑦ ᐊᒃᓱᕈᕐᓇᕈᑕᐅᔪᓐᓇᖅᖢᓂ ᐱᔨᑦᑎᕋᖅᑎᓄᑦ ᐊᐅᓚᓐᓂᐊᕐᓗᒋᑦ ᐊᒻᒪ CCTS−ᑯᑦ ᑲᒪᒋᓂᐊᕐᓗᒋᑦ.

ᑕᕝᕙᓂ ᑲᔪᓯᓂᕆᔭᐅᔪᒥ, ᑲᑎᒪᔩᑦ ᕿᓂᖅᐳᑦ ᓂᐅᕕᖅᐸᒃᑐᓄᑦ ᓴᐳᔾᔨᓯᒪᓂᕐᒧᑦ ᑐᓴᐅᒪᑎᑦᑎᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᑐᑭᓯᓇᕐᓂᖅᓴᐅᓗᑎᒃ ᐊᑕᐅᓰᓐᓇᒃᑰᓕᕐᓗᑎᒡᓗ ᑲᑎᖦᖢᒋᑦ ᐊᑕᐅᓯᙳᖅᑎᑕᐅᓗᑎᒃ ᓇᓗᓇᐃᒃᑯᑕᕐᒧᑦ (ᓂᐅᕕᖅᐸᒃᑐᓄᑦ ᓴᐳᔾᔨᓯᒪᓂᕐᒧᑦ ᒪᓕᒃᑕᐅᕙᒃᑐᖅ), ᑕᐃᒪᐃᓕᐅᕐᓂᕐᒥᓂᓗ ᒥᑭᒡᓕᒋᐊᖅᑎᑦᑎᓗᑎᒃ ᐊᐅᓚᑦᑎᓂᕐᒧᑦ ᑐᓗᖅᑕᕈᑕᐅᕙᒃᑐᓂᒃ. ᐃᓚᒋᓪᓗᓂᐅᒃ ᑕᒪᑐᒪ ᑲᔪᓯᓂᐅᑉ, ᑲᑎᒪᔩᑦ ᐃᓄᓕᒫᖅᑎᑦᑎᓗᑎᒃ ᑲᑎᒪᑎᑦᑎᓛᖅᑐᑦ ᒑᑎᓅ, ᑯᐸᐃᒃᒥ, ᐱᒋᐊᕐᓗᓂ ᓄᕕᐱᕆ 30, 2026−ᒥ.

ᐊᔪᕆᖅᓲᔾᔨᔪᒪᓪᓗᑎᒃ ᐱᔪᒪᔪᓂᒃ ᐃᓄᖕᓂᒃ ᑐᓂᓯᓂᐊᖅᑎᓪᓗᒋᑦ, ᐃᒥᐊᓗᓕᕆᔨᕐᔪᐊᒃᑯᑦ ᐃᓚᓕᐅᔾᔨᓯᒪᕗᑦ ᓂᐅᕕᖅᐸᒃᑐᓂᒃ ᓴᐳᔾᔨᓯᒪᓂᕐᒧᑦ ᓇᓗᓇᐃᒃᑯᑕᕐᒥᒃ ᐱᓕᕆᔾᔪᑎᒃᓴᒥᒃ ᑎᑎᕋᖅᓯᒪᔪᒥᒃ ᐅᐃᒍᐊᕈᓯᖅ 1-ᒥ ᑕᕝᕙᓂ ᑐᓴᖅᑎᑦᑎᔾᔪᑎᒥ. ᑐᕌᖓᑎᑕᐅᕗᖅ ᐱᑎᑦᑎᔪᒪᓪᓗᓂ ᐊᑐᖅᑕᐅᔪᓐᓇᖅᑐᒥᒃ ᐊᑕᐅᓰᓐᓇᒃᑰᓕᖅᑎᑦᑎᓂᕐᒧᑦ ᒪᓕᒃᑕᐅᕙᒃᑐᒥᒃ ᐱᒋᐊᖅᑎᑦᑎᔪᒪᓂᕐᒧᓪᓗ ᐅᖃᖃᑎᒌᖕᓂᕐᒥᒃ ᐊᐃᕙᔾᔪᑕᐅᔪᒥᒡᓗ. ᐊᑕᖐᔪᒥᒃ ᑎᑎᕋᖅᓯᒪᔪᓂᒃ ᐊᐱᖅᑯᑎᒃᓴᓂᒃ ᓇᓂᔭᐅᔪᓐᓇᖅᐳᑦ ᐅᐃᒍᐊᕈᓯᖅ 2−ᒥ ᑕᕝᕙᓂ ᑐᓴᖅᑎᑦᑎᔾᔪᑎᒥ. ᑐᓴᖅᑕᐅᔪᒃᓴᐃᑦ ᖃᓄᖅ ᐃᓚᐅᔪᓐᓇᕐᒪᖔᖅᐱᑦ ᑕᕝᕙᓂ ᑲᔪᓯᓂᕆᔭᐅᔪᒥ ᑐᓂᓯᓗᑎᒡᓘᓐᓃᑦ ᐃᓱᒪᒋᔭᕐᓂᒃ ᐅᑯᑎᒎᓇᖅ, CRTC ᐅᖃᖃᑎᒌᖕᓂᒃᑯᑦ ᐃᑭᐊᖅᑭᕕᒃᑯᑦ ᐃᓚᐅᑎᑦᑎᓂᕐᒧᑦ ᐊᑐᖅᑕᐅᕙᒃᑐᒥ ᓇᓂᔭᐅᔪᓐᓇᖅᐳᑦ ᐅᕙᓂ, 'ᑭᓱᓂᒃ ᖃᐅᔨᒪᔭᕆᐊᖃᕐᒪᖔᖅᐱᑦ ᐃᓚᐅᓂᐊᕐᓗᓂ ᑕᕝᕙᓂ ᑲᔪᓯᓂᕆᔭᐅᔪᒥ' ᐊᕕᒃᓯᒪᓂᖓᓂ ᑕᕝᕙᓂ ᑐᓴᖅᑎᑦᑎᔾᔪᑎᒥ.

ᑐᓴᖅᑕᐅᔭᕆᐊᖃᓪᓗᐊᑕᖅᑐᑦ ᑕᕝᕙᙵᑦ ᑐᓴᖅᑎᑦᑎᔾᔪᑎᒥᒃ ᐱᔭᒃᓴᐅᕗᑦ ᐊᒥᐊᓕᒐᒃᑯᑦ ᐊᒡᒐᒃᑯᑦ ᐅᖃᓪᓚᒍᓯᒃᑯᑦ (ASL) ᐊᒻᒪ Langue des signes québécoise (LSQ) ᑎᓕᔭᐅᓯᒪᔪᑦ ᐃᑭᐊᖅᑭᕕᖓᓂ. ᑲᑎᒪᔩᑦ ᐊᖏᖅᓯᖃᑦᑕᕐᓂᐊᖅᐳᑦ ᑕᕐᕆᔭᐅᑎᒃᑯᑦ ᐅᓚᕕᓴᐃᓂᕐᒥᒃ ASL−ᑯᑦ ᐊᒻᒪ LSQ−ᑯᑦ ᑕᒪᑐᒧᖓ ᐱᓕᕆᐊᖑᔪᒧᑦ.

ᓇᐃᓈᖅᓯᒪᔪᖅ ᑖᑦᓱᒧᖓ ᖃᐅᔨᒃᑲᐃᔾᔪᑎᒧᑦ ᑐᓴᕆᐊᕐᕕᖃᕐᓂᕐᒧᑦ ᐊᑐᐃᓐᓇᐅᔪᖅ ᐅᑯᓇᙵᑦ ᐅᖃᐅᓯᕐᓂᑦ: ᐊᓂᓯᓈᐱᒨᕕᓐ (ᑲᓇᓐᓇᖓᓂ ᐱᖓᓐᓇᖅᐸᓯᐊᓂᓗ Ojibway), Dëne Sųłıné (Chipewyan), Innu-Aimun (Innu), Michif, Mikmaq (Mi'kmawi'simk), Plains Cree (Paskwâwinîmowin), ᐊᒻᒪᓗ Qikiqtaaluk ᓂᒋᐊᓂ (ᕿᑭᖅᑖᓘᑉ ᓂᒋᐊᓂ ᐃᓄᒃᑎᑐᑦ). ᐱᔪᒪᔪᑦ ᐃᓄᐃᑦ ᑐᓂᓯᔪᓐᓇᕐᒥᔪᑦ ᐃᑲᔫᑎᓂᑦ ᑖᒃᑯᓄᖓ ᐅᖃᐅᓯᕐᓄᑦ.