Gagwedwewin newen kidang inendamowinan – Maamowi zhichigaadeg owi Giizhaa Agaa Yaajig Gichi dibaajimowin Naaknigewin.

Owi CRTC aanji ginowaabmdaan owi naakinigewin owi Giizhaa Agaa Yaajig gichi dibaajimowin dash owi maziwe kiing waasamo-asabi mazinaa-igan miinwaa gagwech ayaawong (madwewechigan miinwaa masinaatesijigan) gichi dibaajimowin maampii Gaanada ada memaanji nishing aasgaawitaagewin owi ezhichigaadeg, maagweng miinwaa makigaadeg Giizhaa Agaa Yaajig edigosingh maziwe owi gichi dibaajimowin zhichigewin.

Owi CRTC wiikijinaan kina Giizhaa Agaa Yaajig miinwaa gaawii ayaawisiwaad Giishaa Agaa Yaaji bemaadizijig zhinda Gaanada awii wiidokaaziwaad zhinda dinaangidoniwin, dash wiigwa, owi memdage wiikijinindwaa Giizhaa Agaa Yaajig bemaadizijig. Owi CRTC dowaabmdaan awii maamowi-zhichigaadeg maanda naakinigewin gewe Giizhaa Agaa Yaajig genwaabmjigejig, bizindaajigejig, giichi dibaajimajig, miinwaa e’digosingh eshtojig. Owi CRTC ada wiidokwaan Giizhaa Agaa Yaajig bemaadizijig kina gwa zhichigewin epiichi temigag maanda nankiiwin.

Maanda mazinigan aawon maandobiigan miinwaa zhibiigaadeg memaanji shpendaagwog zinagiziwinan minwaa gagwedwewinan owi gagwejimigewin. Onji owi moshkin e’digosingh miinwaa moshkin zhibiigan newen gagwedwewinan, aga bigosenimigwo awii ginondwaa owi Broadcasting Notice of Consultation CRTC 2024-67.

Maanda mazinigan age temigad ninda eni zhibiigaadeg iniwewinan: Plains Cree (Paskwâwinîmowin); South Baffin Inuktitut (Qikiqtaaluk nigiani); Ojibway (Anishinaabemowin); Denesuline (Dëne Sųłıné); Montagnais (Innu-Aimun); Mikmaq (Mi'kmawi'simk); miinwaa Michif.

Enaabidag

Apii 2019-2020 (Oshkintam zhichigewin). Wiiba wiikijinakiing dinaangidoniwinan agii tenon gewe Giizhaa Agaa Yaajig gichi dibaajimajig miinwaa e’digosingh eshtojig woshme weweni awii wiindamaagewaad miinwaa gikendamang newen zinagiziwinan awaa nakwechigaadeg zhinda naaknigewin aanji ginowaabmjigaadeg. Newen moshkin ezhi waabmjigaadeg maadookiing gewe waaji dinakimigizijig megwaa temigag ninda wiikijininakiing dinaangidoniwinan adaa ginowaabmjigaadenon zhiwe owi “Wegonesh Agaa Kidiiyin” wiindamaagewin: CRTC Wiiba Wiikijinakiing Dinaangidoniwinan.

Apii 2024-03-22, owi CRTC agii maajiishkaatoonan newen bemaadizijig gagwejimigewinan (Ekwa niizhing zhichigewin) owi mokinamiwaad Broadcasting Notice of Consultation CRTC 2024-67 awii gagwedwewaad gikidang inendamowinan owi maamowi-zhichigaadeg owi Giizhaa Agaa Yaajig Gichi dibaajimowin Naakinigewin.

Gdo ayaan apiinish 2024-07-22 awii niindaawewin gdo inendaman kidiyin.

Newen nakwetamowinan maagwewin ada naadmaagemigad giizhendamang wegwe age digosingh zhiwe owi oshkiwii maamowi-zhichigaadeg Giizhaa Agaa Yaajig Gichi dibaajimowin Naakinigewin. Awii gagwekwenjigaadeg owi Giizhaa Agaa Yaaji Bemaadizijig ado ayaanaa-aa memaanji michaag zhisewin awii naanaagidowendamowaad ninda gagwedwewinan miinwaa miigwewin owi maamowi zhichigaademigag owi naaknigewin, owi nankiiwin ada digozinon niibna n’ching biimskodemigag owi gagwedwewinan ombisijigaadeg zhiwe newen nakwetamowinan agaa debinigaadeg zhiwe owi zhaazhigwa biimskobidewin.

Shkwaa temigag owi bemaadizijig gagwejimogowinan, owi CTRC ada miigwen wiiba waamjigewinan (Ekwa nisiwi zhichigewin) gewe Giizhaa Agaa Yaaji waadokaazijig awii miigwengh owi zhisewin owi onji woshme gikidang iniwendamowinan owi baajigaademigag naakinigewin.

Owi woshme gikendamowin newen enakiing miinwaa zhichigewinan, aga bigosenimigwo awii ginowaabmdaman Giizhaa Agaa Yaajig gichi dibaajimowin 2019-217.

Wiindamaagewinan nendowendaagwog miinwaa nanaagidowendamowin

Waadokaazijig onji wiiba wiikijinakiing dinaangidoniwinan agii maakibiigaade owi maanda nankiiwin adaa nanaagidowaabmjigaade newen Giizhaa Agaa Yaajig odenwinan meneziwaad, bimaadiziwin gikendamowinan, zinaagiziwinan owi misenjigaadeg gichi dibaajimowinan zhichigewinan miinwaa nda gikendamang wegwen dnowaa e’digotemigag gichi inendaagwod gewe odenwining debendaagozijig.

Gagwedwewin 1. Gego ana gdo ayaanan maanendamowinan misendaman miinwaa makaman Giizhaa Agaa Yaajig wiindamaagewinan (madwewechigan, mazinaatesijigan miinwaa/maage zhiwe maziwe kiing waasamo-asabi mazinaa’igan gichi dibaajimowin, owi e’digosingh madwewechigewin, mazinaatesijiginan, memaanjiinijig mazinaatesijiginan, enkamigag akiing dibaajimowin, akiing ezhiwebak, dinaangidoniwinan, miinwaa odena gikendamowin)?

1. Wegnesh naawisijigewinan ninda maanendamowinan age miigwemiba? 

Gagwedwewin 2. Ana newen wiindamaagewinan miinwaa e’digosingh minaadendaagadon/gagweck waabmdowemigadoon giin miinwaa/maage gdo odena? Aga bigosenimigwo awii miigwewin kidwin inendamowinan inakiiyaa neniish gwa Giizhaa Agaa Yaajig miinwaa gaawii ayaawisiwaad Giishaa Agaa Yaaji gichi dibaajimajig (dibishko gonaa wiindamge zhichigewinan). 

1. Aaniish nikiiyaa wiindamaagewin woshme inowendaagwog miinwaa waabmdowemigag gewe Giizhaa Agaa Yaajig bemaadizijig?

Gagwedwewin 3. Ana newen madwewechige wiigwaaman, mazinaatesemigag zhichigewinan, miinwaa maziwe kiing waasamo-asabi mazinaa’igan gichi dibaajimajig nakweshkaanaa-aa gdo mineziwinan miinwaa beshigendaman? Aga bigosenimigwo awii miigwewin kidwin inendamowin inakiiyaa neniish gwa Giizhaa Agaa Yaajig miinwaa gaawii ayaawisiwaad Giishaa Agaa Yaaji gichi debaajimajig.

1. Wegonesh nanaawichigewinan age zhichigaadegiba owi newen gichi dibaajimowin zhichigewinan woshme weweni awii nakweshkang gdo mineziwinan miinwaa beshigendaman? Aga bigosenimigwo awii dibaataman.
2. Ana newen wiindamaagewinan miinwaa e’digossingh minaadendaagadon/gagweck waabmdowemigadoon giin miinwaa/maage gdo odena?
3. Aaniish nikiiyaa wiindamaagewin woshme age inowendaagwog miinwaa waabmdowemigag?
4. Aaniish ezhi debinaman wiindamaagewin zhichigewinan (biindigewesijiganing, biindige’aabiigsing mazinaatesijigan, giizhgwong onji biindigewesing [naagon), maage maziwe kiing waasamo-asabi mazinaa-igan)?

Gagwedwewin 4. Giishpin aawiyin e’digosingh eshtood maage owi gichi dibaajimad, aga bigosenimigwo awii kidiyin gdo inendamowin owi nikiiyaa wiiji nakiindiwinan aga aasgaabwichigaadeg Giizhaa Agaa Yaajig wiindamaagewin:

1. Wegonesh newen gnimaa wiiji nakiindiwinan biitwi Giizhaa Agaa Yaajig miinwaa gaawii ayaawisiwaad Giishaa Agaa Yaaji gichi dibaajimajig/e’digosingh eshtojig ezhinaagwog? Aga bigosemigagwo awii miigwewin gikinwaabmjiganan newen gnimaa age zhinaagwog maage megwaa etegin wiiji nakiindiwinan.
2. Wegonesh bamitaagewinan maage inaakonigaadeginan age naadmaagwaad owi Giizhaa Agaa Yaajig e’digosigin eshtojig owi gashkitowaad ezhitowaad awii gichi dibaajimang zhiwe madwewechigan, mazinaatesjigan maage maziwe kiing waasamo-asabi mazinaa-igan? Aga bigosenimigwo awii miigwewin gikinwaabmjiganan newen gnimaa bamitaagewinan maage inaakonigaadeginan.

Aanji bimaadiziimigag newen Giizhaa Agaa Yaajig iniwewinan miinwaa inaadiziwin

Ntam zhichigewin waadokaazijig agii wiindamaagewog owi gichi dibaajimowin owi Giizhaa Agaa Yaaji iniwewinan gichi aawon owi iniwewin aanji bimaadiziimigag, ginowenjigaadeg, miinwaa waabmdowemigag Giizhaa Agaa Yaajig bimaakinidiziwaad. Waadokaazijig agii kidwog zinagendamowin owi naajitoong newen gete inaadiziwinan zaam onji nondesemigag madwewechigan miinwaa mazinaatesijigan wiindamaagewinan owi memdage waabmdowemigag Giizhaa Agaa Yaajig inaadiziwinan, inendamowinwaa miinwaa iniwewinan.

Gagwedwewin 5. Owi ana megwaa maagweng owi wiindamaagewin, (digosingh, dinaangidooniwin, miinwaa mezinaatesingh) miinigowin mineziyin miinwaa beshigendaman?

1. Wegonesh nanaawichigewinan nendowendaagwog?

Gagwedwewin 6. Aaniish nikiiyaa owi gichi dibaajimowin owi Giizhaa Agaa Yaajig iniwewin gewe kina bemaadizijig miigwemigag owi gagaandinigaadeg miinwaa aanji bimaadiziimigag Giizhaa Agaa Yaajig iniwewinan?

Gagwedwewin 7. Owi ayaawiyin gichi dibaajimad, gdo gikendaanan ana gego odena naagaanwidojig maajitaawinan megwaa ezhiwebag awii naadmaagengh ginowenjigaademigag Giizhaa Agaa Yaajig iniwewinan?

1. Gego ana ninda gajichigewinan dikobidenon newen gichi dibaajimowin etemigag (madwewechigan, mazinaatesjigan maage maziwe kiing waasamo-asabi mazinaa-igan)?
2. Aaniish owi Giizhaa Agaa Yaajig Gichi Dibaajimowin Naaknigewin woshme aasgaabiwitood Giizhaa Agaa Yaajig gichi dibaajimajig nenda gashkitowaad owi ginowenjigaadeg Giizhaa Agaa Yaajig iniwewinan miinwaa inaadiziwinan?

Waawiindamowinan owi Giizhaa Agaa Yaajig e’digosingh, mina maajiizhkaawin miinwaa wiiji naagizowaabmjigengh

Newen zhaazhigwa CRTC giizhendamowinan, Giizhaa Agaa Yaajig madwewechigewin wenaamjiginon agii waawiinjigaademigad “owi madwewechigewin wenaamjigan ozhibiigaadeg miinwaa mamaanjiiniwin owa bemaadizid e’yaang Canadian dibendaagoziwin miinwaa ezhi waambdizid aawid Giizhaa Agaa Yaajig, owi e’digosingh Anishinaabe, Wiisaakode maage Eshkiimewi.”

Gagwedwewin 8. Ana maanda waawiindamowin maagweng maampii ishpiming deminig aawon owi onji gagwekwenjigaadeg owi temigag Giizhaa Agaa Yaajig madwewechigewin maziwe-iing owi gichi dibaajimowin zhichigewin? Aga bigosenimigwo awii dibaataman.

1. Ayaa-aabi ana bkaan waawiindamowinan enkaazang nongo wiinge mina daapinigaadenon gewe Giizhaa Agaa Yaaji e’digosingh eshtojig miinwaa gnimaa age naabidagiba onji naakinigewin? Aga bigosenimigwo awii miigwewin moshkin dibaajimowin miinwaa onjibaamigag ninda bkaan waawiindamowinan.
2. Wegonesh newen aanin megwaa etegin naagijigewinan gnimaa age naabidagiba awii minaadenjigaadeg owi gagwekwenjigaadeg owi Anishinaabewinigag owi biindiwesijigan e’digosingh jibwaa zaagidowewesingh.

Owi ginowaabmijigaadeg owi biindigewesingh-mazinaatesingh, owi CRTC agii waawiindaan owi “Giizhaa Agaa Yaajig eshtood” owa bemaadizid ezhi waabmdizad aawid Giizhaa Agaa Yaajig, e’digosingh Anishinaageg, Wisaakodeg maage Eshkiimewi, miinwaa endaad maampii Gaanada, maage onjikewong mazinchige nakiiwin zhiwe gnigen gwa 51% owi biminizhigaadeg majinigaademigad bezhig maage woshme bemaadizijig owi ezhi waamdizijig aawiwaad Giizhaa Agaa Yaajig miinwaa endaawaad maampii Gaanada.

Gagwedwewin 9. Ana maanda nikiiyaa maagweng maampii ishpimingh miigsemigad awii waawiinjigaadeg Giiizhaa Agaa Yaajig e’digosingh?

1. Ada naadmaagemigad ana gagwekwenjigaadeg temigag owi Giizhaa Agaa Yaajig biindigewesingh-mazinaatesingh e’digosingh masiwe-iing owi gichi dibaajimowin zhichigewin? Aga bigosenimigwo awii dibaataman.
2. Wegonesh meshkwod waawiinjigaadewin(an) owi Giizhaa Agaa Yaajig biindigewesingh-mazinaatesingh e’digosingh aabdeg age dibegenjigaadegiba?
3. Wegonish wiijiniindiwin(an), giishpin gego, age miigwe-aapa owi waawiinjigaadeg miinwaa nisidiwinaajigaadeg Giizhaa Agaa Yaajig biindigewesingh-mazinaatesingh e’digosingh? 

Owi ezhi waabmdamiwaad gewe Ntam zhichigewin waadokaazijig, owi waawiindamowin owi mina maajiishkaang owi Giizhaa Agaa Yaajig gichi wiindamaagejig miinwaa owi dibaatamowin maagwewaad adaa onjibaamigad wiinwaa ado waawiindamowiniwaa miinwaa gaawii zhaazhiginaazhii dibagewinan, zhiwe owi memdage genwaabmjigaadeg zhoonyaakewin gazhkichigaadeg dash owi ezhi doodamoomigag owi ado odenwiningh.

Gagwedwewin 10. Wegonesh dibizhigewinan age dibegenjigaademigag zhiwe owi waawiinjigaadeg mina maajiishkaawin?

1. Wegonesh owi mina maajiishkaawin ezhinaagwog gewe Giizhaa Agaa Yaajig gichi dibaajimajig.
2. Ana maanda waawiinjigewin adaa bisaabiigad onji bkaan ezhiwebakin?

Gagwedwewin 11. Aawiyin owa Giizhaa Agaa Yaajig gichi dibaajimad, aaniish ezhi gagwekwendaman owi dibatamowin/mazinatesidowin maagwewin bamiikaan owi beshigendamowaad miinwaa meneziwaad gewe Giizhaa Agaa Yaajig bazindaajigejig/genwaabmjigejig?

1. Aaniish ezhi dibizhiman maanda?
2. Wenesh dnowaa ezhi nakiiyin nyaagwog e’wenaabmdaman? 
3. Owi wiiji nakiindiwin owi CRTC, wegonesh owa age naadmaagepa majiishkaatoongh owi ezhi nakiing nyaagwog minwaa dibagaademigag ado mina maajiishkaawin?

Ntam Zhichigewin waadokaazijig agii kidwog owi ani shkwaa awiiwong owi nankiiwin, owi gichi kiing wiijiiwewin adaa zhichigaademigad awii zhitoong owi dibaajimowin mazinigan waabmdowemigag owi megwaa ezhiwebak gewe gichi dibaajimajig, owi temigag “newen zhichiganan” awii zhibiigaadeg nendowendaagwog awii zhichigengh, apii ensa bezhig owi zhichigewin age maajitaamigag, miinwaa apii gashkitowinan agaa gashkitchigaadeg. Bezhig nkiiyaa awii gagaandinigaadeg gagwek zhichigengh zhiwe dibaajimong aawon owi wiiji naagizowaabmjigewin miinwaa dibizhigaadewin owi maajiishkaatoong owi Giizhaa Agaa Yaajig Gichi dibaajimowin Naakinigewin.

Gagwedwewin 12. Aaniish ezhi waawiindaman wiiji naagizowaabmjigengh?

1. Gdo gikendaanan ana megwaa etemigag dibizhigewinan owi wiiji naagizowaabmjigengh?

Dibaamdiziwin

Ntam Zhichigewin waadokaazijig agii kidwog owi gichi piitendaagwog owi nisidwaabmjigaadeg odenwinan meneziwaad owi ogimaakodaadiziwin, dibaamdiziwin, miinwaa ado nakiiwiniwaa owi zigakinigaadeg owi inaadiziwin. Naagizowaabmjigaadeg aawon bezhig ayaawong owi gichi dibaajimowin naaknigewin owi gagaandinigaadeg gagwek zhichigengh biitwi odenwinan miinwaa gewe gichi dibaajimajig enkiitaagiwaad.

Waadokaazijig age makowaatagoziwog owi gichi piitendaagwod gewe Giizhaa Agaa Yaajig gichi debaajimajig awii zhitowaad maamowi yaawaad to ginodamowaadmeneziwaad zhiwe owi woshme mechaagin dibaajimowin nakiiwin maampii Gaanada, miinwaa gwa gagwek nikiiyaa, Giizhaa Agaa Yaajig bemaadizijig adaa zhitonaa-aa wiinwaa ado gichi dibaajimowin naaknigewinan miinwaa biminizhaanaa-aa wiinwaa ado onjikegaabiwiimigag inaaknigejig.

Gagwedwewin 13. Aaniish nikiiyaa owi Giizhaa Agaa Yaajig Gichi dibaajimowin Naakinigewin zhitoomigag zhisewin owi naagizowaabmjigaadeg gewe Giizhaa Agaa Yaajig bemaadizijig awii gagwekwendaagwog Giizhaa Agaa Yaajig dinaangidoniwinan miinwaa dibaajimowinan waabmdowemigag?

Gagwedwewin 14. Wegnesh newen bamitaagewinan miinwaa maanendamowinan owi maajiishkaatoongh Giizhaa Agaa Yaajig naaganwidojig miinwaa Giizhaa Agaa Yaajig bamibidetowaad gichi dibaajimowin wiijiindiwin?

1. Wenesh age memaanji minagaabiwipa awii zhitood, izhisidod miinwaa biminizha-ang owi dnowaa nakiiwin?
2. Aabdeg ana owi CRTC adaa digokaaza? Giishpin geget, dibaajiman owi nikiiyaa.

Gagwedwewin 15. Temigadoon ana bkaan zinagiziwinan miinwaa zinagendamowinan memdage gwa owi Giizhaa Agaa Yaajig Gichi dibaajimowin naakinigewin nendowendaagwog awii naawitoong?

1. Aaniish nikiiyaa owi CRTC ombinang wiijiindiwin gewe Giizhaa Agaa Yaajig bemaadizijig zhiwe ado gichi dibaajimowin dinaangiidonwinan?
2. Aaniish nikiiyaa owi CRTC aasgaabiwitwod Giizhaa Agaa Yaajig odenwinan owi nakiitowaad ado dibaamdiziwin? Aga bigosenimigwo woshme awii dibaajimoyin.
3. Aanish nikiiyaa agezhi dowendaman awii wiidokaaziyin awii miigwewin nawisijigewinan?

Aaniish ezhi wiidokaaziyin

Awii wiidokaaziyin, gdaa niindaawenon gdo nakwetamowinan/kidiwinan zhiwe bezhig newen eni zhibiigaadeg niswi nikiiyaa:

• Nakwetan aanin maage kina gagwedwewinan owi CRTC Dinaangidonwinan, waasamo asabi mazinaa-igan wiikijinakiiwin desijigan. Gewe goweta maagwewaad enendamowaad zhiwe waasamo-asabi biiwaabikons mazina-igan wiikijinakiingh desijigan gaawii nendaagozisiiwog wiijii-ewaad owi dinaangidoniwin. Awii wiidokaaziwaad maanda dinaangidoniwin, mensendamjig bemaadizijig aabdeg ada niindaawewog owi mashkowi nanginiwe.
  • Maanda nanaanda-gikenjigewin ada temigad Zhaaginaashiimiwin, Wemitogozhiimiwin, Plains Cree (paskwâwinîmowin); South Baffin Inuktitut (Qikiqtaaluk nigiani); Ojibway (Anishinaabemowin); Denesuline (Dëne Sųłıné); Montagnais (Innu-Aimun); Mikmaq (Mi'kmawi'simk); miinwaa, Michif.
  • Maanda desijigan ada daapinaanon kidowinan zhiwe owi nowonj nikiiyaa e’digozing, mazinaatesingh, biindigewesingh-mazinaatesingh, miinwaa dinaangidoniwin niindaawewinan.
  • Ginowaabmdan owi Wiindamaagewin owi Gagwejimigowin CRTC 2024-67 owi wiidokaaziwin zhibiiganan.
• Niindaawen gdo nakwetamowinan owi zhibiiman aanin maage kina gagwedwewinan owi nikiiyaa:
  • nikaaziyin owi nanginiwe moshkinebiigan;
  • niindaawen mazinaakozigan odi 819-994-0218; maage
    mazinigan enji niindaaweng CRTC, Ottawa, Ontario K1A ON2
  • Miinwaa aanke Zhaaginaashiimiwin miinwaa Wemitigozhiimiwin, niindaawewinan adaa zhibiigaadenon owi Plains Cree (Paskwâwinîmowin); South Baffin Inuktitut (Qikiqtaaluk nigiani); Ojibway (Anishinaabemowin); Denesuline (Dëne Sųłıné); Montagnais (Innu-Aimun); Mikmaq (Mi'kmawi'simk); miinwaa Michif. Niindaawewinan owi bkaan Giizhaa Agaa Yaajig iniwewinan age ada daapinigaadenon. Gdo gigiikimigwo awii ginoondwaa hearing@crtc.gc.ca awii gagwedwewin wiiji temigag owi iniwewin gaawii ezhibiigaadesinag maampii ishpiming.
• Bamibidetoon owi odenwining endaajig niigaanwidowaad wiikijinakiing dinaangidoniwin owi onji gdo odena, maamowibii-an ekidowinan miinwaa niindaawen odi CRTC bezhig nikiiyaa ezhibiigaadeg maampii ishpiming.  Abi ginooshinaang owi woshme gikendamowin owi waasamo-asabi biiwaabikons mazina-igan odi autochtones-indigenous@crtc.gc.ca maage giigido biiwaabikoong odi 1-877-249-CRTC (2782).