Taypwawchikaywin poor itwaywina – Mamouwiyawuk di Indigene Kawpimoustatahk Pimipayihtawin

Ooma CRTC si igzaminee ooma pimipayihtawin ouschi Indigene kawpimoustatahk akousheeshi online pi anishkootootamowin (li radio pi li tv) kawpimoustatahk didanw Kenadaw chikee miyeu sheetouskem ooma oushihchikaywin, noukouhtawin pi mishkawaywin di Indigene acimowina shawpouou kawpimoustatahk aen system.

Ooma CRTC kweeweehkoumikiwow kahkiyaw Indigene pi namoo-Indigene li moond didanw Kenadaw chi-geetakowchik ooma paminamoowin, mawka, ispray taypwawtayw Indigene li moond. Ooma CRTC natounem chi-weechi-oushtahk ooma pimipayihtawin avek Indigene wawpaschikaywak, natoustamwuk, otachimouwak, pi acimowina oushihchikaywuk. Ooma CRTC chi-nawkatahkawtam avek Indigene li moond didawn itahto li pwant maykwawt ooma paminikaywin.

Ooma li dokumawn aykwawnima kochiwahpatahiwaywin pi itashtaw kischee li troub pi lee kesyoon poor kishkayistamihiwaywin. Poor kahkiyuw acimowina pi kahkiyuw en list ouschi lee kesyoon, madoon wawpasta Kawpimoustatahk Wawpahchikawtaywin di Kishkayistamihiwaywin CRTC 2024-67.

Ooma dokumawn meena ihtahkoun ishi kaw-pimitishahikawtayki la lawngaezh: Plains Cree (Paskwâwinîmowin); South Baffin Inuktitut (Qikiqtaaluk nigiani); Ojibway (Anishinaabemowin); Denesuline (Dëne Sųłıné); Montagnais (Innu-Aimun); Mikmaq (Mi'kmawi'simk); pi aen Michif.

Itapatisiwin

Ishpee 2019-2020 (Aykwy-ikouhk 1), weeput nawkatahkawtamouwina peekishkwatamoowina kee-ihtakwun avek Indigene otachimouwak pi acimowina oushihchikaywuk chi-miyeu weestamakayhk pi chi-kishkayhtakwun li troub chi- nakatouhkawta didawn ooma pimipayihtawin kaw-igzaminee.  Ooma shawpou-weestamakaywin la veu awn pawr avek weechihiwaywak shawpou oohin nawkatahkawtamouwina peekishkwatamoowina chikee wawpaschikawtayw itay “Kaykwuy Kaw-itwayin” ripor: CRTC Weeput Nawkatahkawtamouwina Peekishkwatamoowina.

Ishpee 2024-03-22, ooma CRTC kaw-mawchistahk li piblik kishkayistamihiwaywina (Ishchikawtayw 2) ouschi kinawniwun Kawpimoustatahk Wawpahchikawtaywin di Kishkayistamihiwaywin CRTC 2024-67 chi- taypwawchikayt poor itwaywina ishi mamouwiyawuk ouschi Indigene Kawpimoustatahk Pimipayihtawin.

Ki-ayawn ishko 2024-07-22 chi-ichahamin ki-itwaywina.

Ki-nashkoumiwaywina kaw-mekiyin chi-weechstaw kiko chikee ashtayk didawn ooma neu mamouwiyawin Indigene Kawpimoustatahk Pimipayihtawin.  Chi-kayschinahow aykwawnima Indigene lee moond ayow miyeu si posib la sawns chi-nawkatawayistamahk oohin lee kesyoon pi weechihiwayw ishi mamouwiyawuk ouschi pimipayihtawin, ooma paminikaywin chi-ihtakoun mischayt itahtwaw lee kesyoon chi-takwashtahk nashkoumiwaywina kaw-outistikow kayahtay ouschi.

Kaw-pimitishahikawtayki li piblik kishkayistamihiwaywin, ooma CRTC chi-wawpastahiwayw avawn lee veu (Aykwy-ikouhk 3) ishi Indigene weechihiwaywak chi-meki la sawns poor ahkamay itwaywina kaw-itayistakwahk pimipayihtawin.

Poor ayiwawk weehstamakaywin ouschi paminikaywin pi ishchikawtayk, madoon wawpasta Kawpimoustatahk Wawpahchikawtaywin di Kishkayistamihiwaywin 2019-217.

Kaweetahkamikuhk endawaychikaywina pi mawmitonayistamoowin

Weechihiwaywak weeput ouschi nawkatahkawtamouwina peekishkwatamoowina itwaywuk aykwawnima ooma paminikaywin chikee nawkatawayistahk Indigene li alawntour endawaychikaywina, kishkayistamoowina, li troub avek chi-kawschitinamaen kawpimoustatahk pamihiwaywin, pi igzaminee kiko itouwahk acimowina si aykwawnihi mishi-akishoowin ishi daw alawntour li mambr.

Aen kesyoon 1. Ki-muwnayshkawkwun chin chi-kawschitinamaen pi chi-meeshkoupitamin Indigene kaweetahkamikuhk (li radio, li tv pi/keema online kawpimoustatahk, kiko avek miseuk, li TV shou, lee video, li moovee, la nouvel, ayshikeeshikawk, metawaywin, podcasts, pi alawntour weehstamakaywin)?

  1. Kiko mowatakwashtaywina ishi aykwawnihi muwnayshkawkaywina ki-itayistaen? 

Aen kesyoon 2.  Paminikaywina chi pi acimowina nahiyikouhk/kataw nawkatawayistam kiya pi/keema toon alawntour? Madoon meki itwaywina ishi tou lee deu Indigene pi namoo-Indigene otachimouwak (i.e. kawpimoustatahk pamihiwaywin). 

  1. Tawnsheeshi kaweetahkamikuhk nawut ayiwawk nahi ashtayki and nanawkatawayistam ishi Indigene le moond?

Aen kesyoon 3. Li radio staysyoon chin, li tv pamihiwaywin, pi online otachimouwak nakishkam ki-endawaychikaywina pi nahkatwayihtamoowina? Madoon meki itwaywina ishi tou lee deu Indigene pi namoo-Indigene otachimouwak.

  1. Kiko lee zaenproovmawn chikee itouchikawtayk akousheeshi kawpimoustatahk pamihiwaywin nawut nakishkam ki-endawaychikaywina pi nahkatwayihtamoowina? Madoon weesta.
  2. Paminikaywina chin pi acimowina nahiyikouhk/kataw nawkatawayistam kiya pi/keema toon alawntour?
  3. Tawnsheeshi kaweetahkamikuhk nawut ayiwawk nahi ashtayki pi nanawkatawayistam?
  4. Tawnsheeshi ki-outisitikon kaweetahkamikuhk pamihiwaywin (daw li radio, li kawbl, li sateli [sateli], keema online)?

Aen kesyoon 4. Keeshpin kiya acimowina oushihchikayw keema otachimouw, madoon itway tawnsheeshi en partineuz weechayhtoowin chikee sheetouskem Indigene kaweetahkamikuhk:

  1. Kaykwuy anihi si poslb en partineuz weechayhtoowin awnter Indigene pi/keema namoo-Indigene otachimouwak/acimowina oushihchikaywuk ishinakwun? Madoon meki kochiwahpatahiwaywina ouschi si posib nistwayr keema or kaw-ihtakoohk en partineuz weechayhtoowin.
  2. Kiko ouhpihiwaywina keema lee miseure chikee weechihik Indigene acimowina oushihchikaywuk ta-itashtayiki see acimowina pimoustatawin daw li radio, li tv keema online? Madoon meki kochiwahpatahiwaywina ouschi si posib ouhpihiwaywina keema lee miseure.

Kaw-pimawtishimakahk ouschi Indigene la lawngaezh pi ishihchikewin

Aykwy-ikouhk 1 weechihiwaywak weesta aykwawnima kawpimoustatahk ishi Indigene la lawngaezh si aykwawnima kishcee ishi la lawngaezh kaw-pimawtishimakahk, kenawayschikawtayk, pi nanawkatawayistam Indigene ayikwakun. Weechihiwaywak keepeekishkwatum nakatwayistamoowina ouschi kaw-wanistahk anishkootootamowin ishihchikewins ayis aka ikouhk li radio pi li tv kaweetahkamikuhk aykwawnima wawpaschikawtayw Indigene ishihchikewins, la veu pi la lawngaezh.

Aen kesyoon 5. Maykwawt chin kaw-mekihk kaweetahkamikuhk (miseuk, peekishkwaywin, pi daw li video acimowina) ki-weechihikoun ishi endawaychikaywina pi nahkatwayihtamoowina?

  1. Kiko lee zaenproovmawn nitawayischikawtaywa?

Aen kesyoon 6. Tawnsheeshi ooma pimoustatawn ouschi Indigene la lawngaezh ishi mishahkamik daw li piblik weechihiwayw chi-pimoustatawt pi awn navawn kaw-pimawtishimakahk Indigene la lawngaezh?

Aen kesyoon 7. Ishi otachimouw, kiya chin kishkayistaen piko tawnima alawntour- neekawneeshtamakaywina aykwawnihi kaw-ishpayiki weechihiwayw chi- kenawayschikawtayk Indigene la lawngaezh?

  1. Piko tawnihi oohin kousheewina shakamoun ishi kawpimoustatahk lee veu (li radio/li tv/online)?
  2. Tawnsheeshi Indigene Kawpimoustatahk Pimipayihtawin ayiwawk sheetouskem Indigene otachimouwak sa koucheewin chi-kenawayschikawtayk Indigene la lawngaezh pi ishihchikewins?

La diskripsyoon ouschi Indigene acimowina, di sa fe baen pi weechi-pishishkayischikawtayw

Ishpee kayahtay CRTC itayistamoowina, Indigene miseuk nawashounikeewina kee-nishtawinawkouhkayw ishi “aen miseukal nawashounikaywin mashinahikawtayw keema nakamouhtawn ouschi la moond aykwawna aen zhawn'd Kenadaw pi nishtawaymishouw ishi Indigene, kiko chikee avek Li Promyee Nawsyoon, Aen Michif keema Aen Niskimoo.”

Aen kesyoon 8. Ooma la diskripsyoon kaw-wawpaschikawtayk layr nahiyikouhk poor itapatisiwin chi-kayschinahow kaw-ihtakouhk di Indigene miseuk shawpou ooma kawpimoustatahk aen system? Madoon weesta.

  1. Ihtakwun chin kootak li diskripsyoon anoush kaw-awpachistahk mishiway itay outinikawtayw ouschi Indigene acimowina oushihchikaywuk pi chikee wayschi awpachistawn poor lee lway’d itapatisiwin? Madoon meki weestamakaywina pi kawawshakawshkayhk oohin kootak lee diskripsyoon.
  2. Kaykwuy anihi awtist kaw-ihtakoohk kishkinwahikaywin aykwawnihi chikee awpachistawn nahiyikouhkishi chi-kayschinahow ooma Indigeneity ouschi pikishkwemoohtawin acimowina avawn kaw-wawpastahiwayhk?

Didawn ooma ishchikataywin ouschi pikishkwemoohtawin-wawpaschikaywin, ooma CRTC nishtawinawkouhkayw aen “Indigene oushihchikayw” ishi li moond kaw wiya-itaymishoow ishi Indigene, kiko avek Li Promyee Nawsyoon, Aen Michif keema Aen Niskimoo, pi weekiw didawn Kenadaw, keema kaw-peyako ishihchikayk la koonpayeen kiko iyikouhk nanduw 51% ouschi paminmamoowin nahkatwayihtumin michiminikawtayw ouschi payyek pi ayiwawk li moond wiya-itaymishoow ishi Indigene weekiw didawn Kenadaw.

Aen kesyoon 9.  Ooma nakishkamoowin kaw-noukohtahk layr nahiyikouhk chi- nishtawinawkouhkayw Indigene acimowina?

  1. Chi-weechistaw chin chi-kayschinahow ihtawina ouschi Indigene pikishkwemoohtawin-wawpaschikaywin acimowina shawpou kaw-kawpimoustatahk aen system? Madoon weesta.
  2. Kiko kootak diskripsyoon(s) ouschi Indigene pikishkwemoohtawin-wawpaschikaywin acimowina chikee itayistakwahki?
  3. Kiko mamowwiitowuk(s), keeshpin ihtakwun, chikee weechihiwayw chi-nishtawinahchik itaymishoowin pi nishtawinikaywin Indigene pikishkwemoohtawin-wawpaschikaywin acimowina? 

Pleu lwayn ooma ishi Aykwy-ikouhk 1 weechihiwaywak, la diskripsyoon ouschi di sa fe baen poor Indigene otachimouwak pi kaweetahkamikuhk kaw-vi ofayr chikee itaymakuhk ouschi wiya-ikouhk sa diskripsyoon pi namoo shakouchihiwaywin li standard, akouta kitawpaschikawtayw mawna ishi larzhawn di sa fe baen pawschi kenawawpaschikawtaywin awiyek kaw-itouta daw soo alawntour.

Aen kesyoon 10. Kiko paminumoowin chikee itayistakwahki daw li diskripsyoon ouschi di sa fe baen?

  1. Kaykwuy anima di sa fe baen ishinakwun poor Indigene otachimouw?
  2. Ooma li diskripsyoon chikee chin chinakwuhk poor peetoush different ayimihoowin?

Aen kesyoon 11. Ishi aen Indigene otachimouw, tawnsheeshi kayschinahon aykwawnima kaweetahkamikuhk kaw-vi ofayr awpataniwun ooma nahkatwayihtumins pi endawaychikaywina ouschi Indigene natoustamwuk/wawpaschikaywak?

  1. Tawnsheeshi lee miseure ooma?
  2. Kiko itouwahk awpachischikana ki-nawashoonayn? 
  3. Didawn keetakoowin avek CRTC, awina chikee weechihiwayw chi-oustahk awpachischikana pi lee miseure see di sa fe baen?

Aykwy-ikouhk 1 weechihiwaywak itayitakwun aykwawnima pounipayiwin ooma paminikaywin, mishiway itay tipayischikaywak chi-oushihchikawtayk ripor en kart kaw-nanawkatawayistam maykwawt ayimihoowin avek otachimouwak, avek “itahkamikshoowin awpachischikana” chi-weeschikawtayk kiko endawaychikaywina chi-itouchikawtayk, tawnshpee itahkamikshoowin mawsheemakun, pi ishpee kay-ishpayik kashkihouwina.  Payyek kaykwuy ishi chi-moushahkinikawtayk pishkayimiwawn shawpou li ripor si aykwawnima weechi-pishishkayischikawtayw pi tipapashkootawn kaw-pimoustatahk ouschi Indigene Kawpimoustatahk Pimipayihtawin.

Aen kesyoon 12. Tawnsheeshi chi-nishtawinawkouhkayw weechi-pishishkayischikawtayw?

  1. Kiya chin kishkayhtayn ouschi kaw-ihtakoohk paminumoowin poor weechi-pishishkayischikawtayw?

Wiya-ikou ashpayimouwin

Aykwy-ikouhk 1 weechihiwaywak keepeekishkwatum ooma aenportaan chi-nishtawinikawtayk li alawntour sa nitawaysitamoowin poor wiya-ikouhk tipaymishouwin, wiya-ikou ashpayimouwin, pi atoushkaywin katakoowin avek kenawayschikawtaywin ouschi ishihchikewin. Pishishkayischikawtayw saprawn payyek li veu kawpimoustatahk pimipayihtawin aykwawnima kaw-moushahkinikawtayk pishkayimiwawn awnter li alawntour pi otachimouwak aywaniki kaw-apachihikouchik.

Weechihiwaywak meena weestanwak aykwawnima aenportaan poor Indigene otachimouwak chi-natamashkawkayt sa neeshohkamakaywin poor see endawaychikaywina daw mishawa kawpimoustatahk tashihkaywin didawn Kenadaw, pi aykwawnima nawachiko, Indigene li moond oushistawuk wiya sa pimoustatawin see pimipayihtawin pi kawpaminuhk wiyawow sa ashpayimouwin.

Aen kesyoon 13. Tawnsheeshi ooma Indigene Kawpimoustatahk Pimipayihtawin oushistaw lispass poor pishishkayischikawtaywin ouschi Indigene li moond chi-kayschinahow Indigene lee koont pi nistwayr nanawkatawayistam?

Aen kesyoon 14. Kaykwuy anihi ouhtishoowina pi muwnayshkawkaywina chi-oushtahk Indigene-neekawneewin pi Indigene-paminikaywin kawpimoustatahk kweetakoowin? 

  1. Awina chikee nahishkem chi-oushtawniwun, arawnzhee, pi paminum itouwahk mamowwiitowuk?
  2. CRTC chin chikee takow? Keeshpin tawpway, weesta tawnsheeshi.

Aen kesyoon 15. Kootaka chin li troub pi nakatwayistamoowina ispray ishi Indigene kawpimoustatahk pimipayihtawin kaw-natawayistakwahki chi-nakatouhkawtayki?

  1. Tawnsheeshi CRTC chikee yahkipitam keetakoowin ouschi Indigene li moond itay kawpimoustatahk paminamoowina?
  2. Tawnsheeshi CRTC sheetouskem Indigene li alawntour kaw-pimoustatawt see wiya-ikou ashpayimouwin? Madoon weestamakay.
  3. Tawnsheeshi ki-nouhtay nawkatahkawtayn chi-meki mowatakwashtaywina?

Tawnsheeshi chi-geetakow

Chi-geetakow, ka-kee-ichahamin ki-weestamakaywina/itwaywina didawn ishi payyek kaw-pimitishahikawtayki ouschi trwaw ouschi: