CRTC-ᑯᑦ ᕿᒥᕐᕈᔭᖓᑦ ᐊᑐᐊᒐᖅ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᖏᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕖᑦ ᐊᒻᒪᓗ ᐊᑐᖅᑕᐅᕙᒃᑐᑐᖃᐅᔪᑦ (ᓈᓚᐅᑎᒃᑯᑦ ᐊᒻᒪᓗ ᑕᓚᕕᓴᒃᑯᑦ) ᑐᓴᖅᓴᐅᑎᑕᐅᖃᑦᑕᖅᑐᑦ ᑲᓇᑕᒥᑦ ᐱᐅᓛᒃᑯᑦ ᐃᑲᔪᖅᑕᐅᔪᖕᓇᕐᓂᐊᕐᒪᑕ ᓴᖅᕿᑕᐅᔪᑦ, ᑕᑯᒃᓴᐅᑎᑕᐅᔪᑦ ᐊᒻᒪᓗ ᖃᐅᔨᔭᐅᔪᖕᓇᖅᑐᑦ ᓄᓇᖃᖅᖄᖅᑐᓂᒃ ᐱᔾᔪᑎᖃᖅᑐᑦ ᑐᓴᖅᓴᐅᑎᑕᐅᖃᑦᑕᖅᑐᒃᑯᑦ.
CRTC-ᑯᑦ ᖃᐃᖃᑕᐅᖁᔭᖏᑦ ᓄᓇᖃᖅᖄᖅᑐᓗᒃᑖᑦ ᐊᒻᒪᓗ ᓄᓇᖃᖅᖄᖅᑑᖏᑦᑐᑦ ᐃᓄᐃᑦ ᑲᓇᑕᒥᑦ ᐃᓚᐅᓂᐊᕐᓗᑎᒃ ᐱᓕᕆᐊᖑᔪᒥᑦ, ᑭᓯᐊᓂ, ᐃᓚᐅᖃᑕᐅᖁᔭᐅᓗᐊᖅᑐᑦ ᓄᓇᖃᖅᖄᖅᑐᑦ ᐃᓄᐃᑦ. CRTC-ᑯᑦ ᐱᕙᓪᓕᐊᖃᑕᐅᔪᒪᔪᑦ ᐊᑐᐊᒐᒥᑦ ᓄᓇᖃᖅᖄᖅᑐᓂᒃ ᑕᐅᑐᖃᑦᑕᖅᑐᓂᒃ ᐱᖃᑎᖃᕐᓗᑎᒃ, ᑐᓵᖃᑦᑕᖅᑐᓂᒃ, ᑐᓴᖅᓴᐅᑎᑦᑎᖃᑦᑕᖅᑐᓂᒃ, ᐊᒻᒪᓗ ᐃᓗᐊᓃᓐᓂᐊᖅᑐᓕᐅᕆᔪᓂᒃ. CRTC-ᑯᑦ ᐱᖃᑎᖃᕐᓂᐊᖅᑐᑦ ᓄᓇᖃᖅᖄᖅᑐᑦ ᐃᓄᖕᓂᑦ ᓇᓃᓐᓂᓗᒃᑖᖓᓂᑦ ᐱᓕᕆᐊᖑᑎᓪᓗᒍ.
ᑎᑎᖅᖃᐅᑎ ᓇᐃᓈᖅᓯᒪᔪᖅ ᐊᒻᒪᓗ ᐱᑕᖃᖅᑎᑦᑎᑉᓗᓂ ᐱᔾᔪᑕᐅᓗᐊᖅᑐᓂᒃ ᐊᒻᒪᓗ ᐊᐱᖅᖁᑕᐅᔪᓂᒃ ᐅᖃᖃᑎᖃᕐᓂᐅᓂᐊᖅᑐᒧᑦ. ᐃᓗᐃᑦᑑᔪᓂᒃ ᐃᓗᐊᓃᑦᑐᓂᑦ ᐊᒻᒪᓗ ᑎᑎᕋᖅᓯᒪᔪᓗᒃᑖᑦ ᐊᐱᖅᖁᑕᐅᔪᓄᑦ, ᑕᑯᓗᒍ ᑐᓴᖅᓴᐅᑎᑦᑎᓂᕐᒧᑦ ᖃᐅᔨᒃᑲᐅᑎ ᐅᖃᖃᑎᖃᕐᓂᕐᒧᑦ CRTC 2024-67.
ᑎᑎᖅᖃᐅᑎ ᒪᓂᒪᖕᒥᔪᖅ ᐅᑯᐊ ᐅᖃᐅᓯᒃᑯᑦ: Plains Cree-ᑎᑐᑦ (Paskwâwinîmowin); ᕿᑭᖅᑖᓘᑉ ᓂᒋᐊᓂᑦ ᐃᓄᒃᑎᑐᑦ; Ojibway-ᑎᑐᑦ (Anishinaabemowin); Denesuline-ᑎᑐᑦ (Dëne Sųłıné); Montagnais-ᑎᑐᑦ (Innu-Aimun); Mikmaq-ᑎᑐᑦ (Mi'kmawi'simk); ᐊᒻᒪᓗ Michif-ᑎᑐᑦ.
2019-2020-ᒥᑦ (ᐱᕙᓪᓕᐊᓂᖓᓂᑦ 1), ᓯᕗᓪᓕᖅᐹᓂᑦ ᑲᑎᒪᑎᑦᑎᓚᐅᖅᑐᑦ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᔨᓂᒃ ᐊᒻᒪᓗ ᐃᓗᐊᓃᑦᑐᓕᐅᕆᔨᓂᒃ ᐃᑲᔪᕐᓂᐊᖅᑐᓂᒃ ᐊᒻᒪᓗ ᖃᐅᔨᑎᑦᑎᓗᑎᒃ ᐱᔾᔪᑕᐅᔪᓂᒃ ᐱᓕᕆᐊᖑᔭᕆᐊᖃᖅᑐᑦ ᐊᑐᐊᒐᕐᒥᑦ ᕿᒥᕐᕈᓂᕐᒥᑦ. ᓇᓗᓇᐃᔭᖅᓯᒪᔪᑦ ᑕᐅᑐᒐᕆᔭᐅᔪᑦ ᑐᓂᔭᐅᓚᐅᖅᑐᑦ ᐃᓚᐅᖃᑕᐅᓚᐅᖅᑐᓄᑦ ᑲᑎᒪᑎᓪᓗᒋᑦ ᑕᑯᔭᐅᔪᖕᓇᖅᑐᑦ “ᐅᖃᖅᑕᑎᑦ” ᐅᓂᑉᑳᒥᑦ: CRTC-ᑯᑦ ᓯᕗᓪᓕᖅᐹᓂᑦ ᑲᑎᒪᑎᑦᑎᖏᑦ.
2024-03-22-ᒥᑦ, CRTC-ᑯᑦ ᐱᒋᐊᖅᑎᑦᑎᓚᐅᖅᑐᑦ ᑭᑐᑐᐃᓐᓇᓂᒃ ᑲᑎᒪᑎᑦᑎᓂᕐᓂᒃ (ᐱᕙᓪᓕᐊᓂᖓᓂᑦ 2) ᓴᖅᕿᑦᑎᑉᓗᑎᒃ ᑐᓴᖅᓴᐅᑎᑦᑎᓂᕐᒧᑦ ᖃᐅᔨᒃᑲᐅᑎ ᐅᖃᖃᑎᖃᕐᓂᕐᒧᑦ CRTC 2024-67 ᓂᑉᓕᐅᑎᖃᖁᔨᑉᓗᑎᒃ ᐱᕙᓪᓕᐊᖃᑕᐅᓂᐅᑉ ᒥᒃᓵᓄᑦ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᒥᑦ.
ᑭᐅᔭᑎᑦ ᐃᑲᔪᕐᓂᐊᖅᑐᑦ ᓱᓇᐃᑦ ᐃᓗᐊᓃᑦᑕᕆᐊᖃᕐᒪᖔᑕ ᓄᑖᖅ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᓕᐊᖑᔪᒥᑦ. ᓄᓇᖃᖅᖄᖅᑐᑦ ᐃᓄᐃᑦ ᐊᖏᓛᒃᑯᑦ ᑕᑯᒃᓴᐅᑎᑕᐅᔪᖕᓇᕐᓂᐊᕐᓗᑎᒃ ᐊᐱᖅᖁᑕᐅᔪᓄᑦ ᐊᒻᒪᓗ ᐃᑲᔪᐃᓗᑎᒃ ᐱᕙᓪᓕᐊᔭᐅᖃᑕᐅᓂᖏᓐᓄᑦ ᐊᑐᐊᒐᕐᒥᑦ, ᐱᓕᕆᐊᖑᔪᖅ ᐊᔾᔨᒌᙱᑦᑐᓂᒃ ᐊᐱᖅᖁᑎᑕᖃᐅᕐᓂᐊᖅᑐᖅ ᐱᔭᐅᔪᓂᒃ ᓯᕗᓂᐊᒍᑦ ᑭᐅᔾᔪᑕᐅᓚᐅᖅᑐᓂᑦ.
ᑭᑐᑐᐃᓐᓇᓂᒃ ᐅᖃᖃᑎᖃᖅᖄᖅᑎᓪᓗᒋᑦ, CRTC-ᑯᑦ ᑕᑯᔭᐅᑎᓐᓂᐊᖅᑕᖏᑦ ᓯᕗᓪᓕᐅᓚᐅᖅᑐᑦ ᕿᒥᕐᕈᔭᐅᓃᑦ (ᐱᕙᓪᓕᐊᓂᖓᓂᑦ 3) ᓄᓇᖃᖅᖄᖅᑐᓄᑦ ᐃᓄᐃᑦ ᐃᓚᐅᓚᐅᖅᑐᓄᑦ ᓂᑉᓕᐅᑎᖃᕈᒪᒍᑎᒃ ᐊᑐᐊᒐᓕᐊᖑᔪᒪᔫᑉ ᒥᒃᓵᓄᑦ ᐱᕕᖃᖅᑎᓐᓂᐊᕐᓗᒋᑦ.
ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ ᐱᓕᕆᐊᖑᔪᓂᑦ ᐊᒻᒪᓗ ᐱᕙᓪᓕᐊᔪᓂᑦ, ᑕᑯᓗᒍ ᑐᓴᖅᓴᐅᑎᑦᑎᓂᕐᒧᑦ ᖃᐅᔨᒃᑲᐅᑎ ᐅᖃᖃᑎᖃᕐᓂᕐᒧᑦ 2019-217.
ᐃᓚᐅᖃᑕᐅᔪᑦ ᓯᕗᓪᓕᖅᐹᓂᑦ ᑲᑎᒪᑎᑦᑎᓂᕐᓂᑦ ᐅᖃᓚᐅᖅᑐᑦ ᐱᓕᕆᐊᖑᔪᒥᑦ ᑕᑯᒃᓴᐅᑎᑕᐅᔭᕆᐊᖃᕐᓂᖏᑦ ᓄᓇᖃᖅᖄᖅᑐᑦ ᓄᓇᓕᖏᓐᓄᑦ ᐱᔭᐅᔭᕆᐊᓖᑦ, ᐊᑐᖅᓯᒪᓂᑯᖏᓐᓂᑦ, ᐱᔾᔪᑎᖃᖅᑐᓂᑦ ᐱᖃᑦᑕᕈᖕᓇᕐᓂᖏᓐᓄᑦ ᑐᓴᖅᓴᐅᑎᑦᑎᓂᕐᒧᑦ ᐱᔨᑦᑎᕋᐃᖃᑦᑕᖅᑐᓂᑦ, ᐊᒻᒪᓗ ᕿᒥᕐᕈᓗᒋᑦ ᐃᓗᓕᖏᓐᓂᒃ ᑐᑭᖃᖅᑑᔪᓂᒃ ᓄᓇᓕᖕᒥᐅᓄᑦ.
ᐊᐱᖅᖁᑎ 1. ᐊᒃᓱᕈᕐᓇᖅᑐᒥᒃ ᐊᑐᖃᑦᑕᖅᐱᑦ ᐱᓂᐊᕐᓗᑎᑦ ᐊᒻᒪᓗ ᖃᐅᔨᓗᒋᑦ ᓄᓇᖃᖅᖄᖅᑐᓂᒃ ᑐᕌᖓᔪᓂᒃ (ᓈᓚᐅᑎᒃᑯᑦ, ᑕᓚᕕᓴᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᑐᓴᖅᓴᐅᑎᑕᐅᔪᓂᒃ, ᐃᓚᐅᑉᓗᑎᒃ ᑎᑕᒃᑐᑦ, ᑕᓚᕕᓴᒃᑯᑦ, ᐊᐅᓚᔪᒃᑯᑦ, ᑕᕐᕆᔭᐅᑎᓂᑦ, ᐱᕙᓪᓕᐊᔪᓕᕆᔨᓂᒃ ᑐᓴᒐᒃᓴᓂᒃ, ᓯᓚᒥᑦ, ᐱᖃᐃᓕᓴᕐᓂᒃᑯᑦ ᕿᑎᒃᑐᓂᑦ, ᖃᕆᑕᐅᔭᒃᑯᑦ ᑐᓴᖅᓴᐅᑎᑕᐅᔪᓂᒃ, ᐊᒻᒪᓗ ᓄᓇᓕᖕᒥᑦ ᑐᑭᓯᐅᒪᔾᔪᑎᓂᒃ)?
ᐊᐱᖅᖁᑎ 2. ᑐᕌᖓᔪᑦ ᐊᒻᒪᓗ ᐃᓗᓕᖏᑦ ᐃᒃᐱᒍᓱᖕᓂᖃᖅᖢᑎᒃ/ᓇᓚᐅᑦᑎᔪᒃᑯᑦ ᑕᑯᒃᓴᐅᑎᑕᐅᖃᑦᑕᖅᐸᑦ ᐃᓕᖕᓄᑦ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᖕᓄᑦ? ᐃᓱᒪᒋᔭᕐᓂᑦ ᑐᓂᓯᓗᑎᑦ ᑕᒪᐃᓐᓄᑦ ᓄᓇᖃᖅᖄᖅᑐᓄᑦ ᐊᒻᒪᓗ ᓄᓇᖃᖅᖄᖅᖏᑦᑐᓄᑦ ᑐᓴᖅᓴᐅᑎᑦᑎᖃᑦᑕᖅᑐᓂᑦ (ᓲᕐᓗ ᑐᓴᖅᓴᐅᑎᑦᑎᓂᕐᒧᑦ ᐱᔨᑦᑎᕋᐃᖃᑦᑕᖅᑐᓂᑦ).
ᐊᐱᖅᖁᑎ 3. ᓈᓚᐅᓯᕆᕝᕖᑦ, ᑕᓚᕕᓴᓂᑦ ᐱᔨᑦᑎᕋᐃᖃᑦᑕᖅᑐᑦ, ᐊᒻᒪᓗ ᖃᕆᑕᐅᔭᒃᑯᑦ ᑐᓴᖅᓴᐅᑎᑦᑎᖃᑦᑕᖅᑐᑦ ᑎᑭᐅᑎᓯᒪᕙᖏᑦ ᐱᔭᕆᐊᖃᖅᑕᑉᓯᖕᓄᑦ ᐊᒻᒪᓗ ᐱᔪᒪᓂᖃᕐᕕᒋᔭᑉᓯᖕᓄᑦ? ᐃᓱᒪᒋᔭᕐᓂᑦ ᑐᓂᓯᓗᑎᑦ ᑕᒪᐃᓐᓄᑦ ᓄᓇᖃᖅᖄᖅᑐᓄᑦ ᐊᒻᒪᓗ ᓄᓇᖃᖅᖄᖅᖏᑦᑐᓄᑦ ᑐᓴᖅᓴᐅᑎᑦᑎᖃᑦᑕᖅᑐᓂᑦ.
ᐊᐱᖅᖁᑎ 4. ᐃᓗᓕᖏᓐᓂᓕᐅᖅᑎᐅᒍᕕᑦ ᐅᕝᕙᓘᓐᓃᑦ ᑐᓴᖅᓴᐅᑎᑦᑎᖃᑦᑕᕈᕕᑦ, ᐅᖃᐅᓯᕆᓗᒋᑦ ᖃᓄᖅ ᐱᓕᕆᖃᑎᒋᔭᐅᔪᑦ ᐃᑲᔪᕈᖕᓇᕐᒪᖔᑕ ᓄᓇᖃᖅᖄᖅᑐᓄᑦ ᑐᕌᖓᔪᓕᕆᓂᕐᒥᑦ:
ᐱᕙᓪᓕᐊᓂᖓᓂᑦ 1-ᒥᑦ ᐃᓚᐅᖃᑕᐅᔪᑦ ᐅᖃᓚᐅᖅᑐᑦ ᑐᓴᖅᓴᐅᑎᑦᑎᓂᖅ ᓄᓇᖃᖅᖄᖅᑐᑦ ᐅᖃᐅᓯᖏᑦᑎᒍᑦ ᐃᑲᔪᐃᓇᔭᖅᑐᖅ ᐅᖃᐅᓯᕐᒥᒃ ᐆᒻᒪᖅᑎᑦᑎᓂᕐᒥᒃ, ᐊᓯᐅᔨᑦᑕᐃᓕᓂᕐᒧᑦ, ᐊᒻᒪᓗ ᑕᑯᒃᓴᐅᑎᑦᑎᓗᓂ ᓄᓇᖃᖅᖄᖅᑐᑦ ᐊᐅᓚᑦᑎᓂᖃᕐᓂᖏᓐᓂᑦ. ᐃᓚᐅᖃᑕᐅᔪᑦ ᖃᐅᔨᑎᑦᑎᓚᐅᖅᑐᑦ ᐃᓱᒫᓘᑎᖃᕐᓂᖏᓐᓂᒃ ᐊᓯᐅᔨᔭᐅᕙᓪᓕᐊᓂᖓᑕ ᐱᖅᖁᓯᑐᖃᕆᔭᐅᔪᑦ ᐱᑕᖃᐅᖏᓗᐊᕐᓂᖏᓐᓄᑦ ᓈᓚᐅᑎᒃᑯᑦ ᐊᒻᒪᓗ ᑕᓚᕕᓴᒃᑯᑦ ᑐᕌᖓᔪᓕᕆᓃᑦ ᑕᑯᒃᓴᐅᑎᑦᑎᔪᓂᒃ ᓄᓇᖃᖅᖄᖅᑐᑦ ᐱᖅᖁᓯᖏᓐᓂᑦ, ᑕᐅᑐᒐᖏᓐᓂᒃ ᐊᒻᒪᓗ ᐅᖃᐅᓯᖏᓐᓂᑦ.
ᐊᐱᖅᖁᑎ 5. ᒫᓐᓇᐅᔪᖅ ᑐᕌᖓᔪᓕᕆᓂᖅ (ᑎᑕᒃᑐᑦ, ᐅᖃᓪᓚᒃᑐᑦ, ᐊᒻᒪᓗ ᐊᐅᓚᔪᐃᑦ ᐃᓗᐊᓃᑦᑐᑦ) ᐱᑕᖃᖅᐸᑦ ᐱᔭᕆᐊᖃᖅᑕᖕᓂᑦ ᐊᒻᒪᓗ ᐱᔪᒪᓂᕆᔭᖕᓂᑦ?
ᐊᐱᖅᖁᑎ 6. ᖃᓄᖅ ᑐᓴᖅᓴᐅᑎᑕᐅᓂᖏᑦ ᓄᓇᖃᖅᖄᖅᑐᑦ ᐅᖃᐅᓯᖏᑦᑎᒍᑦ ᐊᖏᓂᖅᓴᐅᔪᒥᒃ ᑭᑐᑐᐃᓐᓇᓅᖓᔪᒃᑯᑦ ᐃᑲᔪᐃᕙ ᓴᖅᕿᔮᖅᑎᑕᐅᓂᖓᓄᑦ ᐊᒻᒪᓗ ᐆᒻᒪᖅᑎᑕᐅᒃᑲᓐᓂᕐᓂᖓᓄᑦ ᐅᖃᐅᓰᑦ?
ᐊᐱᖅᖁᑎ 7. ᑐᓴᖅᓴᐅᖃᑦᑕᖅᑐᓕᕆᔨᐅᑉᓗᑎᑦ, ᖃᐅᔨᒪᕕᑦ ᓄᓇᓕᖕᒥᑦ ᑲᒪᒋᔭᐅᔪᓂᒃ ᐱᓕᕆᐊᓂᒃ ᐃᑲᔪᖅᑐᓂᒃ ᐊᓯᐅᔨᑦᑕᐃᓕᓂᕐᒧᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᒃ?
ᑐᑭᓕᐅᖅᓯᒪᔪᑦ ᓄᓇᖃᖅᖄᖅᑐᓂᒃ ᐱᔾᔪᑎᖃᖅᑐᓂᑦ, ᐱᐊᓂᑦᑎᐊᖅᓯᒪᔪᓂᒃ ᐊᒻᒪᓗ ᖃᐅᔨᓴᐃᓂᖃᖃᑕᐅᔪᓂᑦ
ᓯᕗᓂᐊᒍᑦ CRTC-ᑯᑦ ᐃᓱᒪᓕᐅᖅᓯᒪᔭᖏᓐᓂᑦ, ᓄᓇᖃᖅᖄᖅᑐᑦ ᑎᑕᒃᑎᖏᓐᓂᒃ ᓂᕈᐊᖅᖠᕐᓃᑦ ᑐᑭᓕᐅᖅᑕᐅᓯᒪᓚᐅᖅᑐᑦ “ᑎᑕᒃᑐᓂᒃ ᓂᕈᐊᖅᖠᕐᓂᖅ ᑎᑎᕋᖅᓯᒪᓗᒍ ᐅᕝᕙᓘᓐᓃᑦ ᑎᑕᒃᑎᐅᔪᖅ ᐃᓄᒃ ᑲᓇᑕᒥᐅᑕᐅᓗᓂ ᐊᒻᒪᓗ ᐃᖕᒥᓂᒃ-ᓇᓗᓇᐃᖅᑐᖅ ᓄᓇᖃᖅᖄᖅᑑᓂᖓᓄᑦ, ᐃᓚᐅᑉᓗᑎᒃ ᐃᖅᕿᓖᑦ ᓄᓇᖅᖃᑎᒌᑦ, ᒦᑏ ᐅᕝᕙᓘᓐᓃᑦ ᐃᓄᐃᑦ.”
ᐊᐱᖅᖁᑎ 8. ᑐᑭᓕᐅᖅᓯᒪᔪᖅ ᖁᓛᓃᑦᑐᖅ ᓈᒻᒪᒃᑑᕙ ᐱᔾᔪᑎᒋᔭᐅᑉᓗᓂ ᐱᑕᖃᖅᑎᑕᐅᓂᖓ ᓄᓇᖃᖅᖄᖅᑐᑦ ᑎᑕᒃᑐᑦ ᑐᓴᖅᓴᐅᑎᑦᑎᖃᑦᑕᖅᑐᓂᑦ? ᐅᖃᐅᓯᕆᓗᒍ.
ᓂᐱᓕᐅᖅᓯᒪᓗᒍ-ᑕᑯᒃᓴᐅᔪᒃᑯᑦ-ᒥᑦ, CRTC-ᑯᑦ ᑐᑭᓕᐅᖅᑕᖓᑦ “ᓄᓇᖃᖅᖄᖅᑐᖅ ᐱᓕᐅᕆᔨ” ᐃᓄᒃ ᐃᖕᒥᓂᒃ-ᓇᓗᓇᐃᖅᑐᖅ ᓄᓇᖃᖅᖄᖅᑑᓂᖓᓄᑦ, ᐃᓚᐅᑉᓗᑎᒃ ᐃᖅᕿᓖᑦ ᓄᓇᖃᖅᑎᒌᑦ, ᒦᑏ ᐅᕝᕙᓘᓐᓃᑦ ᐃᓄᐃᑦ, ᐊᒻᒪᓗ ᑲᓇᑕᒥᐅᑕᐅᑉᓗᓂ, ᐅᕝᕙᓘᓐᓃᑦ ᐃᖕᒥᒃᑰᖓᔪᖅ ᐱᓕᐅᕆᓂᕐᒧᑦ ᑲᒻᐸᓂᐅᔪᖅ 51%-ᓗᐊᖏᑦ ᐊᐅᓚᑦᑎᓂᖃᕐᓂᕐᒧᑦ ᐱᔪᒪᓂᖃᕐᓂᖅ ᐱᔭᐅᓯᒪᑉᓗᓂ ᐊᑕᐅᓯᕐᒧᑦ ᐊᒥᓲᓂᖅᓴᓄᓪᓘᓐᓃᑦ ᐃᓄᖕᒧᑦ ᐃᖕᒥᖕᓂᒃ-ᓇᓗᓇᐃᖅᓯᒪᔪᓄᑦ ᓄᓇᖃᖅᖄᖅᑑᑉᓗᑎᒃ ᐊᒻᒪᓗ ᑲᓇᑕᒥᐅᑕᐅᑉᓗᑎᒃ.
ᐊᐱᖅᖁᑎ 9. ᐊᑐᖅᑕᐅᔪᑦ ᖁᓛᓂᑦ ᓈᒻᒪᒃᑑᕙᑦ ᑐᑭᓕᐅᕆᓂᐊᕐᓗᒋᑦ ᓄᓇᖃᖅᖄᖅᑐᑦ ᐃᓗᐊᓃᑦᑐᓂᑦ?
ᒪᓕᒃᖢᒍ ᐱᕙᓪᓕᐊᓂᖓᓂᑦ 1-ᒥᑦ ᐃᓚᐅᖃᑕᐅᔪᑦ, ᑐᑭᓕᐅᖅᓯᒪᔪᖅ ᐱᐊᓂᑦᑎᐊᖅᓯᒪᓂᖅ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᔨᓄᑦ ᐊᒻᒪᓗ ᑐᕌᖓᔪᓕᕆᓂᖅ ᑐᓂᖃᑦᑕᖅᑕᖏᓐᓂᑦ ᐊᑐᕆᐊᖃᖅᑐᑦ ᓇᖕᒥᓂᖅ ᑐᑭᒋᔭᖏᓐᓂᑦ ᐊᒻᒪᓗ ᐃᓂᓕᐅᖅᑕᐅᓯᒪᓂᕐᒧᑦ ᐊᑐᖅᑕᐅᔪᓅᙱᑦᑐᖅ, ᑕᐅᑐᒐᖃᕐᓂᖅ ᑮᓇᐅᔭᑎᒍᑦ ᐱᐊᓂᑦᑎᐊᖅᓯᒪᓂᖃᕐᓂᕐᒨᒐᔪᒃᖢᓂ ᐊᒃᑐᖅᓯᓂᕆᔭᖓᓅᖏᖦᖢᓂ ᓄᓇᓕᐅᑉ.
ᐊᐱᖅᖁᑎ 10. ᓱᓇᐃᑦ ᐊᑐᖅᑕᐅᖃᑦᑕᖅᑐᑦ ᐃᓱᒪᒋᔭᐅᔭᕆᐊᖃᖅᐸᑦ ᑐᑭᓕᐅᕐᓂᐊᕐᓗᒍ ᐱᐊᓂᑦᑎᐊᖅᓯᒪᓂᖅ?
ᐊᐱᖅᖁᑎ 11. ᓄᓇᖃᖅᖄᖅᑐᑦ ᑐᓴᖅᑕᐅᑎᑦᑎᔨᐅᑉᓗᑎᑦ, ᑐᕌᖓᔪᓕᕆᓂᖅ ᑐᓂᖃᑦᑕᖅᑕᐃᑦ ᐃᑲᔪᖅᐸ ᐱᔪᒪᓂᕆᔭᖏᓐᓄᑦ ᐊᒻᒪᓗ ᐱᔭᕆᐊᖃᖅᑕᖏᓐᓄᑦ ᓄᓇᖃᖅᖄᖅᑐᑦ ᑐᓵᖃᑦᑕᖅᑐᓄᑦ/ᑕᐅᑐᖃᑦᑕᖅᑐᓄᑦ?
ᐱᕙᓪᓕᐊᓂᖓᓂᑦ 1-ᒥᑦ ᐃᓚᐅᖃᑕᐅᓚᐅᖅᑐᑦ ᐅᖃᓚᐅᖅᑐᑦ ᐃᓱᐊᓂᑦ ᐱᓕᕆᐊᖑᔪᒥᑦ, ᑲᓇᑕᒥᑦ ᑎᒥᐅᔪᒥᒃ ᐋᖅᕿᒃᓯᔭᕆᐊᖃᖅᑐᑦ ᓴᖅᕿᑦᑎᓂᐊᕐᓗᑎᒃ ᐅᓂᑉᑳᒥᑦ ᑕᑯᒃᓴᐅᑎᓪᓗᒋᑦ ᒫᓐᓇᐅᔪᖅ ᖃᓄᐃᖓᓂᐅᔪᑦ ᑐᓴᖅᓴᐅᑎᑦᑎᖃᑦᑕᖅᑐᓄᑦ, ᐃᓚᐅᓗᒋᑦ “ᖃᓄᐃᓕᐅᕈᑕᐅᓂᐊᖅᑐᑦ” ᐊᑕᐅᓯᕐᒧᐊᕐᓂᐊᕐᓗᒋᑦ ᐱᓕᕆᐊᕆᔭᐅᔭᕆᐊᓖᑦ, ᐊᑐᓂ ᐱᓕᕆᓂᐅᔪᑦ ᐱᒋᐊᕐᓂᐊᕐᒪᖔᑦ, ᐊᒻᒪᓗ ᖃᓄᐃᖓᓂᐅᔪᑦ ᑎᑭᐅᑎᔭᐅᖕᒪᖔᑕ. ᐊᑐᖅᑕᐅᔪᖕᓇᖅᑐᑦ ᐱᔭᒃᓴᐅᑎᖃᖅᑎᑦᑎᓂᕐᒧᑦ ᐅᓂᑉᑳᓕᐅᕆᓂᒃᑯᑦ ᖃᐅᔨᓴᐃᖃᑕᐅᓗᓂ ᐊᒻᒪᓗ ᕿᒥᕐᕈᖃᑦᑕᕐᓗᒋᑦ ᐊᑐᖅᑕᐅᓂᖓᑕ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᖅ.
ᐊᐱᖅᖁᑎ 12. ᖃᓄᖅ ᑐᑭᓕᐅᖅᑕᐅᖃᑦᑕᖅᐸ ᖃᐅᔨᓴᐃᖃᑕᐅᓂᖅ?
ᐱᕙᓪᓕᐊᓂᖓᓂᑦ 1-ᒥᑦ ᐃᓚᐅᖃᑕᐅᔪᑦ ᖃᐅᔨᑎᑦᑎᓚᐅᖅᑐᑦ ᐱᒻᒪᕆᐅᓂᖓᑕ ᐃᓕᑕᕆᓗᒋᑦ ᓄᓇᓖᑦ ᐱᔭᕆᐊᖃᖅᑕᖏᑦ, ᐃᖕᒥᖕᓂᒃ-ᐊᐅᓚᑦᑎᓂᕐᒧᑦ, ᐃᖕᒥᓂᒃ-ᖃᐅᔨᓂᕐᒧᑦ, ᐊᒻᒪᓗ ᐱᓕᕆᐊᕆᔭᖏᑦ ᐊᓯᐅᔨᑦᑕᐃᓕᑎᑦᑎᓂᕐᒧᑦ ᐱᖅᖁᓯᕐᒥᒃ. ᖃᐅᔨᓴᐃᓂᖅ ᐃᓚᒋᔭᐅᔪᖅ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᒥᑦ ᐊᑐᖅᖢᓂ ᐱᔭᒃᓴᐅᑎᖃᖅᑎᑦᑎᓂᕐᒥᒃ ᓄᓇᓕᖕᓂᑦ ᐊᒻᒪᓗ ᑐᓴᖅᓴᐅᑎᑦᑎᖃᑦᑕᖅᑐᑦ ᐱᔨᑦᑎᕋᐃᑉᓗᑎᒃ ᓄᓇᓕᖕᓂᑦ.
ᐃᓚᐅᖃᑕᐅᔪᑦ ᐅᖃᓚᐅᕐᒥᔪᑦ ᐱᒻᒪᕆᐅᓂᖓᑕ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᔨᐅᔪᑦ ᐋᖅᕿᒃᓯᓗᑎᒃ ᑲᑐᔾᔨᖃᑎᒌᒥᒃ ᑭᒡᒐᖅᑐᐃᓂᐊᖅᑐᓂᒃ ᐱᔭᕆᐊᖃᖅᑕᖏᓐᓂᑦ ᐊᖏᓂᖅᓴᐅᔪᒥᑦ ᑐᓴᖅᓴᐅᑎᑦᑎᓕᕆᖃᑦᑕᖅᑐᓄᑦ ᑲᓇᑕᒥᑦ, ᐊᒻᒪᓗ ᐱᐅᓗᐊᕋᔭᖅᑐᖅ, ᓄᓇᖃᖅᖄᖅᑐᑦ ᐃᓄᐃᑦ ᐋᖅᕿᒃᓯᓗᑎᒃ ᓇᖕᒥᓂᖅ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᓂᒃ ᐊᒻᒪᓗ ᐊᐅᓚᑕᐅᔪᓂᒃ ᓇᖕᒥᓂᖅ ᐃᖕᒥᒃᑰᖓᔪᒥᒃ ᑎᒥᐅᔪᒧᑦ.
ᐊᐱᖅᖁᑎ 13 ᖃᓄᖅ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᖅ ᐃᓂᓕᐅᕈᖕᓇᖅᐸ ᖃᐅᔨᓴᖅᑕᐅᓂᐊᕐᓗᑎᒃ ᓄᓇᖃᖅᖄᖅᑐᑦ ᐃᓄᖕᓄᑦ ᓄᓇᖃᖅᖄᖅᑐᒃᑯᑦ ᐅᖃᓪᓚᖕᓃᑦ ᐊᒻᒪᓗ ᐅᓂᑉᑳᑦ ᓄᓇᖃᖅᖄᖅᑐᓂᒃ ᐱᔾᔪᑎᖃᕐᒪᑕ?
ᐊᐱᖅᖁᑎ 14. ᓱᓇᐅᕙᑦ ᐃᑲᔫᑎᐅᔪᑦ ᐊᒻᒪᓗ ᐊᒃᓱᕈᕐᓇᐅᑎᐅᔪᑦ ᓴᖅᕿᑦᑎᓂᐊᕐᓗᓂ ᓄᓇᖃᖅᖄᖅᑐᓄᑦ ᑲᒪᒋᔭᐅᔪᒥᒃ ᐊᒻᒪᓗ ᓄᓇᖃᖅᖄᖅᑐᓄᑦ ᐊᐅᓚᑕᐅᔪᒥᒃ ᑐᓴᖅᓴᐅᑎᑦᑎᖃᑦᑕᕐᓂᕐᒧᑦ ᑲᑐᔾᔨᖃᑎᒌᒥᒃ?
ᐊᐱᖅᖁᑎ 15. ᐊᓯᖏᓐᓂᒃ ᐱᔾᔪᑕᐅᔪᓂᒃ ᐱᑕᖃᖅᐸ ᐊᒻᒪᓗ ᐃᓱᒫᓘᑕᐅᔪᓂᒃ ᐱᔾᔪᑎᖃᖅᑐᓂᒃ ᓄᓇᖃᖅᖄᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᒥᑦ ᐱᓕᕆᐊᖑᔭᕆᐊᖃᖅᑐᓂᒃ?
ᐃᓚᐅᖃᑕᐅᓂᐊᕐᓗᑎᑦ, ᑐᓂᔪᖕᓇᖅᑕᑎᑦ ᑭᐅᔾᔪᑎᒋᔭᑎᑦ/ᐅᖃᐅᓯᕆᔭᑎᑦ ᓇᓕᑐᐃᓐᓇᖏᑦ ᐱᖓᓲᔪᑦ ᐊᑐᕐᓗᒋᑦ: