Beghą ɂesorúsı̨ Nı̨dhęn de nozeké sı - Tsątsąne Benı̨ hųlı̨ hekoth ha Tsamba nı̨t’a ha ɂerıhtł’ıs hołé hotthé behayatı

21 Tsamba Nalyé Za 2023 k’e t’ąnądé dzı̨ne sı ɂedırı ts’ęn yatı nı̨ɂá t’ąt’u ɂedırı Tsątsąne Benı̨ hųlı̨ hekoth ha Tsamba nı̨t’a ts’ę̨n t’ąt’u nezų hetł’el nı̨dhęn sı bası.

Yası yatı beghą

Ku t’ok’e losı dene ɂełk’ech’a narade ɂedırı beghą ɂesodorunı̨ danı̨dhęn beghą de ba hoɂąsı yeghą yatı nı̨ɂa ha ɂedırı yatı t’a hųlı̨ sı: Ɂena, Hotena Ojibwe ɂena, Denesųłı̨ne, Montagnais (Innu) Yuɂąne Ɂena, Mi’kmaq ɂena chu Begharek’ą, Ttthot’ı̨ne chu Bąlaı yatı ɂa.

Ku t’axa dene ha nųt’ą ɂeją

T’ą dene Canada Nask’athe Beyatıe-Televısıon chu t’a Ɂası beyeyatı ha hųlı̨ hots’ı̨ (CRTC) hulye dene ts’erenı̨ sı t’ą losı Tsątsąne Benı̨ hųlı̨ hekoth chu beyeyatı t’orełɂa ha t’ok’e naradé sı ba hųlı̨ ha ɂedırı ha Tsątsąne Benı̨ hųlı̨ hekoth ha Tsamba theɂąsı yeghą ɂesodı horelɂı̨h de ha. T’ą dene k’olde CRTC hots’ı̨ neghą dıtth’agh horelɂı̨h ɂedırı Tsątsąne Benı̨ hųlı̨ hekoth ha Tsamba nezų bet’orı̨dher walı sı ha.

Ku ɂedırı Tsątsąne Benı̨ hųlı̨ hekoth ha Tsamba t’axa nı̨t’ą sı

T’ą dene CRTC ha k’oldé horelyų dene ha ɂełk’esı nųnı̨ɂąsı, t’ok’e dene t’a Tsątsąne Benı̨ hųlı̨ hekoth ha ɂedırı ts’ęn 50 megabits per second nanarı̨łtser hoɂą (Mbps) hulyé ku ɂası bek’e dałe hadé Upload chu ɂedırı 10 Mbps Download ɂası dąlé hadé t’ok’e losı Canada nask’athe dene naradé ɂełk’esı ba nųt’a hoɂa. Ku ɂeyı hel t’ok’e losı tulu helɂa ga dene naradé sı ba tł’ule dałye hoɂą ɂedırı ɂası ba hųlı̨ ha. Ku ɂeyı horelyų hołé hadé ɂedırı t’ą k’olde, CRTC hots’ı̨ dene haradı hu t’ą betł’esı Tsątsąne Benı̨ hųlı̨ hekoth sı ɂedırı tth’ı́ ɂedırı Tsamba nı̨t’a sı ts’erenı̨ hoɂą.

Ku t’ą losı ɂedırı tsamba t’orełɂa horelɂı̨h de t’ąt’u benaré ɂedırı ląt’e ɂası nezų nı̨lyé hobası. T’ą bełt’esı ghetł’el sı ɂedırı ląt’e hats’edı́ sı: t’ok’e losı dene naradé bets’ęn tł’ule het’ı́ ɂedırı hoba, t’a ɂeyı betł’esı ɂası ghetł’el k’ı t’ą dene bekuę dahola sı ts’ęn, tulu ga t’ok’e losı beyeyatı t’oreɂá ha ɂası dałyé hoɂą, huto t’ok’e dene naradé sı satellıte t’oreɂa hoɂą tsątsąne benı̨ hųlı̨ hekoth ha. T’ą dene CRTC ha k’oldé ɂedırı tsąmba nı̨t’a k’ı horelyų ɂası dayenełɂı̨h sı t’ą dene bets’edı hu ɂedırı tsamba ɂa.

Ku t’a ɂedų yalyé chu dene yeghą horełker horelɂı̨h de

T’ą dene CRTC ha k’oldé ɂedırı ɂedų ts’ęn dı̨yı̨ɂa horelɂı̨h t’ąt’u ɂa net’ı̨ chu t’ą bets’edı walı sı ha. Ku horelyų ɂedırı yatı nı̨łɂı̨h horı̨lɂı̨h de t’a bek’e detł’ıs sı chu beghą horúsker nı̨dhęn de t’ąt’u ɂedų halyá sı bası ɂeją sı ɂedırı t’ą ɂedų halya sı:

Ku ɂedırı t’a tsamba nı̨t’ą k’ı bet’a t’ok’e dene naradé sı ba horenı̨ chu detıle ha nı̨t’ą sı
Ku ɂedırı tsamba ghetł’el k’ı t’oho losı t’ok’e dene naradé ba theɂą ha ɂası ha
Tsamba nı̨t’a dene ɂeghadalana ha t’ok’e dene naradé sı beba
Tsamba theɂą ha dųhų t’ok’e ɂedırı ląt’e hųlı̨ hotıe ghetł’el ha t’oho losı
Ku denededłı̨ne t’ok’e haralɂa sı Denededłı̨ne tthé hulta hası̨ ɂedı̨nı̨ naraltı ɂa dǫt’ı́ ląt’e ɂası hedı̨ t’ok’e naradé hųlı̨lé ɂa
Ku t’ok’e dųhų satellıte t’odorełɂa haıyórı̨la dene naradé beyeyatı ttheré halyé ha dene t’ok’e nadé sı nųt’a ha
Ku dųhų t’a betł’esı ɂası dahóla k’ı́ t’ok’e yutthı̨ ts’ęn naradé ɂełk’esı hulta hoɂą haıyorı̨la nedhé k’esı t’ąt’u ba hoɂą k’esı
Ku t’oho ɂedų hajá de ɂeją tth’ı dene hel kąt’u nı̨t’a hoɂą
Ku t’ąt’u dene xa nųt’a betł’esı hoɂą ɂedų halyé ha nųt’a hoɂą t’ok’e net’ı̨ sı bası
Tsamba nı̨t’a hoɂą t’oho ɂası godhé nı̨lyé hoɂą ɂeyer naré
Ku t’ąt’u ɂası hołé ha t’ąt’u sughuá hołé ha

T’ą dene CRTC ha K’oldé k’ı ɂedırı ghą ɂesórusı̨ nı̨dhęn de neba hoɂą sı. Kulu, t’ą dene CRTC ha K’oldé ɂedırı tsamba nı̨ɂa k’ı t’ok’e Denededłı̨ne naradé chu ɂedırı k’enadé sı t’ąt’u dene ts’edarı̨nı̨ nı̨dé sı bası hotıe dene ha nųt’ą walı sı ha horelyų ɂeyı ląt’e ɂası danełɂı̨h hodorelɂı̨h sı dene ha ɂası ghetł’el chu t’ąt’u bets’ęn tsamba nezų ghetł’el dąlı̨ ha.

T’ą dene CRTC ha K’oldé neghą darıtth’agh hodorelɂı̨h ɂedırı ghą t’ąnı̨dhę sı bası, t’ąt’u ɂedırı tsamba t’ąt’u beredı́ dąlı̨ t’ok’e Denededłı̨ne haralɂa bası:

Q1. Ku ɂedłąghe ɂedırı tsamba betł’at’a ha nı̨dhęn ɂa ɂedırı hobası́?

Ku ɂedırı tsamba nı̨t’a k’ı t’ok’e denededłı̨ne haralɂa huto denededłı̨ne ts’ı̨ɂąne ɂası dahóla ba nı̨t’a ɂesǫ́t’ıle husą ku ɂedırı tsamba k’ı dene t’ok’e haralɂa huto denededłı̨ne bets’ı̨ɂąne ɂası hola ba nı̨t’a ɂesǫt’ıle nı̨dhęn hú?
Ku konı̨dhęn de, ɂedłąt’u ɂeyı denededłı̨ne bets’ı̨ɂąne hoɂą de hulɂá ha ɂá?

Q2. T’ą dene CRTC ha K’oldé k’ı ɂedłąt’u t’ą Denededłı̨ne haralɂa k’ı t’ąt’u hulɂa ha ɂá?

Ku ɂedırı hats’edı sı, t’ą denededłı̨ne haralɂa k’̨ı tł’ule k’eyaghe hoɂą hılé de huto t’ok’e nı̨h k’e naradé hats’edı́ k’ı́?

Q3. Ku t’ąt’u begharé ɂedırı Tsątsąne Benı̨ hųlı̨ hekoth ha Tsamba ghetł’el k’ı́ t’a ɂerıhtł’ıs selyé hoɂą chu t’a begharé la hołé chu tsamba ghetł’el dąlı̨ ɂedırı t’á?

Ku t’a begharé ɂası naıdá ha ɂedų halyé hutó, beghoręlyé hutó, huto ɂedų halyá de t’ąt’u nezų bet’orı̨dher walı sı ha Denededłı̨ne haralɂa sı bá husą́?
Ku nahıyé ɂası bedı̨ halyá de, begharęlya hutó, ɂedų halya huto, ɂedłaghe t’a ɂedų halya sı t’ąt’u ɂa ɂedų halya sı.

Q4. Ku ɂedırı beɂąsı ɂası net’ı̨ hadé dene yet’orełɂa ha, ɂedłaghe dene ha la hołe chu yet’orı̨łther walı nı̨dhęn ɂa t’ok’e Denededłı̨ne naradé bebá?

Ku ɂedłąt’u ɂeyı ɂası bet’oredhı́ de t’ąt’u bet’orı̨dher sı net’ı̨ ha ɂá?

Q5. Ku ɂeyı t’a tsamba ghetł’el hots’ı̨ nahıye tsamba ɂeładųne ts’ęn dı̨t’ą walı nı̨dhęn sı k’aɂų hutó beɂąsı haja dé?

Ku ɂeyı tsamba ɂedų ts’ęn nı̨t’a walı nıd̨hęn ɂa t’a horeke nı̨ t’a ha ɂedų haıyı̨la de t’a nı̨t’ą datedhe hutó k’aɂų hajá dé?

Q6. T’ą dene CRTC ha K’oldé k’ı Denededłıne haralɂa sı hel dayałtı ha nųt’ą walı nı̨dhęn ɂa ɂeyı chu t’ą betł’esı ɂası thela sı ɂedırı ghą k’odorelyą dąlı̨ nı̨dé?

Ku t’ą bezı nı̨da theɂą sı ɂedırı bası dene t’ok’e haralɂa sı hel dayałtı hoɂą t’ąt’u ɂa ɂedırı ɂası hołé bel nodhı dąlı̨ bası, chu t’ąt’u bebá nųt’a ɂeyı ghą ɂesódanı̨dhęn de. Ku t’ą Denededłı̨ne haralɂa sı ba ttheré hoɂą t’ok’e Dene tsamba nałya yatı k’e hoɂą naradé de t’ąt’u ba ɂedų hané ghonı̨ t’a. T’ą dene CRTC ha K’oldé sı ɂedırı beghą t’anı̨dhęn sı neghą darıtth’agh hodorelɂı̨h sı t’aghą norelker sı ɂedırı k’ı t’ą dene hodoreke chu t’ą dene haralɂa sı bası:

Q7. Ku ɂedłaghe t’a bet’orı̨dher walı nı̨dhęn ɂa dene he yatı t’ok’e Denededłı̨ne naradé sı bel ɂedırı ghą t’a hełtsı hoɂą nı̨dhęn ɂá?

Ku t’a dene ɂası hodoreké k’ı t’ok’e Tsamba Nałya chu Denededłı̨ne hoghedı yatı (ATRIS) t’orełɂa walı nı̨dhęn husą́ huto ɂeładųne yatı t’a t’ąt’u ɂeyı net’ı̨ chu t’ą denededłı̨ne haralɂa sı hel ɂası hołé há?

Q8. Ku ɂedłąt’u t’ą dene ɂası hodoreké k’ı denededłı̨ne haralɂá yets’edarenı̨ dé boret’ı̨ ha ɂá?

Q9. Ku t’ą dene CRTC ha K’oldé k’ı́ ɂedłąt’u t’ok’e Denededłı̨ne haralɂá sı hel yatı det’al ha t’oho ɂedırı ɂerıhtł’ıs nı̨lyé hıjá dé?

Ɂet’ąt’u nehel nodhı́

Ɂedırı sa 21 Tsamba Nalyé Za 2023 hots’ęn neba hoɂąsı t’anı̨dhęn walı sı ha t’ąt’u ɂedırıTsątsąne Benı̨ hųlı̨ hekoth haTsamba nı̨t’a beghą.

Ɂeją ts’ęn yatı nı̨ɂá horı̨lɂı̨h de neba hoɂąsı:

ɂerıthł’ıs thela senelé horı̨lɂı̨h de;
ɂeją ts’ęn fax nı̨le horı̨lɂı̨h dé 819-994-0218; hutó
nhets’ęn dı̨tł’ıs ɂeją ts’ęn CRTC, Ottawa, Ontario K1A 0N2 ts’ęn.

Ku ɂałų yatı horı̨lɂı̨h de ɂedırı hobası t’ąt’u nel nodhı ha

Ɂeją tsątsąne benı̨ k’e nuhets’ęn ɂerı̨tł’ıs horı̨lɂı̨de emaıl k’e FLB-BBF@crtc.gc.ca huto nanı̨le ɂeją ts’ęn dųłtsı 1-877-249-2782.