ᐃᑭᑐᓇᓂᐊᐧᐣ ᒋᐸᑭᑎᓇᒣᐠ ᐃᑭᑐᐃᐧᓇᐣ ᐨ ᒫᒫᐣᑕᐤ ᐱᐊᐧᐱᑯᔭᑊ ᔓᓂᔭ ᐃᓇᒋᑫᐃᐧᐣ ᑫᓇᑲᒋᒋᑲᑌᐠ

21 ᐊᐱᑕᐃᐧᓃᐱᐣ ᑮᓯᐢ 2023 ᒥᐦᐅᒪ ᒪᒋᐨ ᑭᔑᑲ ᑫᐃᓯᓭᐠ ᒌᑭᐸᑭᑎᓇᒪᐣ ᐃᑭᑐᐃᐧᓇᐣ ᐅᐣᒋ ᒋᑲᑭ ᒥᓄᒋᑲᑌᐠ ᒫᒫᐣᑕᐤ ᐱᐊᐧᐱᑯᔭᑊ ᔓᓂᔭ.

ᒪᒪᐤ ᐄᐧᐣᑕᒪᑫᐃᐧᐣ

ᒪᒪᐤ ᐃᑭᑐᐃᐧᐣ ᐅᐣᒋ ᐃᐧᐣᑕᒪᑫᐃᐧᐣ ᐸᐸᒥᑲᑫᐧᑌᐃᐧᐣ ᐁᑲᓇᐊᐧᐸᐣᒋᑲᑌᐠ ᐃᓯᓭᐃᐧᓇᐣ ᐃᐦᐃᒪ ᑲᐃᔑ ᓇᑭᓑᑲᑫᒪᑲᐠ ᐊᓂᔑᓂᓂᐤ ᑕᔑᑫᐃᐧᓇᐣ ᑭᓇᒋᑲᑌ ᐅᓄᐁᐧᓂᐊᐧᐣ ᐃᔑᑮᔐᐧᐃᐧᓇᐣ: ᒪᓑᑮᑰᒧᐃᐧᐣ, ᐃᓅᐠᑎᑐᐟ, ᐊᓂᔑᓇᐯᒧᐃᐧᐣ, ᑌᓇᓱᓬᐃᐣ, ᒧᐣᑖᓀ (ᐃᓄ), ᒥᐠᒫᐠ ᒥᓇ ᐄᐧᓴᑯᑌᒧᐃᐧᐣ, ᔖᑲᓇᔒᒧᐃᐧᐣ ᒦᓇ ᒪᔭᑫᐧᔒᒧᐃᐧᐣ.

ᑫᐃᓇᐸᒋᒋᑲᑌᐠ ᐅᐦᐅᐁᐧ ᐸᐸᒥᑲᑫᐧᑌᐃᐧᐣ

ᐊᐦᐊᐁᐧ ᑲᓇᑕ ᓇᐣᑐᑕᒧᐃᐧᐣᐨᒐᑲᑌᓯᒋᑲᐣ ᒥᓇ ᒪᒋᑮᑑᐃᐧᐣ ᐅᑭᒪᐃᐧᐣ (CRTC) ᐅᐄᐧᒋᑐᐣ ᒋᑮᑌᐱᓂᑲᑌᐠ ᒫᒫᐣᑕᐤ ᐱᐊᐧᐱᑯᔭᑊ ᐊᐸᒋᒋᑲᐣ ᒥᓇ ᒫᒌᑭᑐᐃᐧᓇᐣ ᑲᒧᒋᑕᑯᓂᑲᑌᑭᐣ ᐃᐦᐃᒪ ᓅᐱᒪᑲᒥᐠ ᒥᓇ ᑭᒋᑮᐁᐧᑎᓄᐣᐠ ᐃᐦᐃᐁᐧ ᐅᐣᒋ ᒪᒪᐣᑕᐤ ᐲᐊᐧᐱᑯᔭᑊ ᔓᓂᔭ. ᐋᐦᐊᐁᐧ CRTCᐅᓇᐣᑕᐁᐧᐣᑕᓇᐋᐧ ᐁᐄᐧᓄᐣᑕᑯᔦᐠ ᐊᓃᐣ ᑫᑮᔑᒪᒦᓄᒋᑲᑌᐠ ᐃᐦᐃᐁᐧ ᒫᒫᐣᑕᐤ ᐲᐊᐧᐱᑯᔭᑊ ᔓᓂᔭ.

ᐅᐣᒋ ᒫᒫᐣᑕᐤ ᐲᐊᐧᐱᑯᔭᑊ ᔓᓂᔭ

ᐊᐦᐊᐁᐧ CRTC ᐅᑮᐅᓇᑐᐣ ᑫᐃᔑ ᒪᒪᐤ ᐊᐹᒋᒋᑲᐣ ᑫᑲᑫᐧᑌᐱᓂᑲᑌᐠ, ᐁᐃᓀᐣᒋᑲᑌᐠ ᒋᓇᑌᐠ ᐲᐊᐧᐱᑯᔭᑊ ᑲ ᐊᐸᒋᒋᑲᑌᐠ ᒥᓂᑯᐠ ᒋᐊᐲᒌᒪᑲᐠ 50 ᒋᐊᐲᒋᐸᓄᐦᐅᒪᑲᐠ ᐯᔑᑯᑎᐸᐦᐃᑲᓀᐣᐢ (Mbps) ᑲ ᒪᒌᔭᓯᒋᑲᓂᐊᐧᐣᐠ ᒥᓇ 10 Mbps ᑲ ᐄᐧᑯᐱᒋᑲᓂᐊᐧᐣᐠ ᒋᐊᐲᒋᒪᑲᐠ ᑲᑭᓇ ᐊᐧᑲᐦᐃᑲᓇᐣ ᒋᐊᔭᐊᐧᐨ ᐅᐦᐅᒪ ᑲᓇᑕ. ᑲᔦ ᐁᑖᑰᓯᐣᐠ ᒋᐊᐊᐧᔑᒣ ᒋᓇᒋᑲᑌᐠ ᒪᒋᑭᑐᐃᐧᐣ ᑲᒧᒋᑕᑯᓂᑲᑌᐠ ᐊᐸᒋᒋᑲᐣ ᒋᑮ ᐊᔭᐋᐧᐨ ᑲᑭᓇ ᐋᐧᑲᐦᐃᑲᓇᐣ ᒥᓇ ᑲᐃᔑ ᐊᔭᑭᐣ ᑭᒋᒥᑲᓇᐣ. ᒋᐄᐧᒋᐦᐃᐁᐧᓭᐠ ᑲᑲᑫᐧᑌᐱᓂᑲᑌᐠ, ᐊᐦᐊᐁᐧ CRTCᐅᓇᐣᑕᐁᐧᓂᒪᐊᐧᐣ ᒪᒋᑭᑐᐃᐧᐣ ᑲᐱᒥᐃᐧᒋᑫᐊᐧᐨ ᒋᐸᑭᑎᓇᐊᐧᐨ ᔓᓂᔭᓇᐣ ᐃᐦᐃᒪ ᒫᒫᐣᑕᐤ ᐱᐊᐧᐱᑯᔭᑊ ᔓᓃᔭᑲᐣᐠ.

ᑫᔕᑲᓑᑭᓀᐲᐦᐃᑫᐊᐧᐨ ᒋᑲᑫᐧᑌᐋᐧᐨ ᔓᓃᔭᓇᐣ ᒋᐅᔑᑐᐊᐧᐨ ᑲᔦᒪ ᒋᐊᐊᐧᔑᒣ ᒦᓄᑐᐊᐧᐨ ᑲᐃᔑ ᐸᑕᑭᑌᑭᐣ ᒪᒌᐁᐧᐸᐦᐃᑲᓇᐣ ᐁᐧᑎᓀᑫ ᓄᐱᒪᑲᒥᐠ ᒥᓇ ᑭᒋ ᑭᐁᐧᑎᓄᐣᐠ. ᐃᓂᐁᐧᓂᐊᐧᐣ ᐲᐊᐧᐱᑯ ᐊᐸᒋᒋᑲᓇᐣ; ᒋᐱᒥᐃᐧᑌᑭᐣ ᐱᐊᐧᐱᑯ ᐊᐸᒋᒋᑲᓇᐣ ᑕᔑᑫᐃᐧᓂᐣᐠ ᒋᔑᐃᐧᑌᑭᐣ, ᒋᑭᑌᐱᓂᑲᑌᐠ ᐲᐊᐧᐱᑯ ᐊᐸᒋᒋᑲᓇᐣ ᑲᐃᔑᐯᔑᑯᑭᐣ ᐋᐧᑲᐦᐃᑲᓇᐣ, ᑲᒧᒋᑕᑯᓂᑲᑌᑭᐣ ᒪᒌᑭᑐᐃᐧᓇᐣ ᐊᐸᒋᒋᑲᐣ ᒋᐊᔭᑭᐣ ᐃᐦᐃᒪ ᑕᔒᑫᐃᐧᓂᐣᐠ ᑲᔦᒪ ᑲᐃᔑᒦᑲᓇᐊᐧᐣᑭᐣ ᑭᒋᒦᑲᓇᐣ, ᑲᔦᒪ ᐲᐊᐧᐱᑯ ᐊᐸᒋᒋᑲᓇᐣ ᒋᑮᐅᐣᑎᓂᑲᑌᑭᐣ ᐃᐦᐃᒪ ᑭᒋᐅᓇᑲᓂᐣᐠ ᑲᐅᐣᒋᑌᐱᓂᑲᑌᐠ ᐱᐊᐧᐱᑯ ᐊᐸᒋᒋᑲᐣ ᑲᐃᓯᓭᑭᐣ ᑕᔒᑫᐃᐧᓇᐣ ᒋᒧᒋ ᐅᓇᑲᓂ ᑲᐣᒋᑲᑌᑭᐣ. ᐊᐦᐊᐁᐧ CRTC ᐅᑲᓇᑲᒋᑐᓇᐣ ᐊᓄᑭᐃᐧᓇᐣ ᐁᐊᐸᒋᑐᐊᐧᐨ ᑲᐄᐧᐣᑕᒪᑫᒪᑲᑭᐣ ᒋᑭᑌᐱᓇᐣᐠ ᒥᓇ ᓇᑲᒋᒋᑫᐃᐧᐣ ᑲᐃᓇᑌᐠ ᐁᑯᓀᓇᐣ ᐊᓄᑭᐃᐧᓇᐣ ᑫᐅᑕᐱᓂᑲᑌᑭᐣ ᒥᓇ ᒋᑮᒦᓇᑲᓀᐊᐧᐨ ᔓᓃᔭᓇᐣ.

ᑳᐃᓀᐣᒋᑲᑌᑭᐣ ᑫᐃᔑ ᐊᓂᒋᒋᑲᓂᐊᐧᐣᐠ ᒥᓇ ᑲᑫᐧᑌᐃᐧᓇᐣ

ᐊᐦᐊᐁᐧ CRTC ᐃᔑᓇᑲᑕᐁᐧᐣᑕᒧᐊᐧᐠ ᒋᒦᔑᓇᑭᐣ ᑫᐃᔑ ᐊᓂᒋᒋᑲᑌᐠ ᒣᑲᐧᐨ ᑲᑐᒋᑲᑌᐠ ᑲᓇᓇᑲᒋᒋᑲᑌᑭᐣ ᒥᓇ ᑲᐅᑕᐱᓂᑲᑌᑭᐣ ᐊᓄᑮᐃᐧᓇᐣ. ᑲᒥᐣᓯᐁᐧᔭᐠ ᐃᐧᐣᑕᒪᑫᐃᐧᐣ ᑲᐃᐧ ᐸᐸᒥᑲᑫᐧᑌᓇᓂᐊᐧᐣᐠ ᑕ ᐊᒋᑲᑌᐊᐧᐣ ᐸᔭᑫᐄᐧᐣᑕᒪᑫᐃᐧᓇᐣ ᒥᓇ ᑲᐧᔭᐠ ᑲᑫᐧᑌᐃᐧᓇᐣ ᐃᓂᐁᐧᓂᐊᐧᐣ ᑫᐃᓯᓭᑭᐣ ᐊᐣᑕᒋᑫᐃᐧᓇᐣ:

• ᒋᓇᐣᑭᓂᑲᑌᐠ ᑌᐱᑎᐸᐦᐃᑫᐃᐧᐣ ᑲᑲᑫᐧᑌᐱᓂᑲᑌᐠ ᐅᐣᒋ ᔓᓂᔭ
• ᒋᐅᓇᒋᑲᑌᐠ ᔓᓂᔭ ᐸᑭᑎᓂᑫᐃᐧᐣ ᐅᐣᒋ ᐊᓄᑮᐃᐧᓇᐣ ᑫᑕᔑᑐᒋᑲᑌᑭᐣ ᐊᓂᔑᓂᓂᐤ ᑕᔑᑫᐃᐧᓂᐣᐠ
• ᔓᓃᔭ ᐸᑭᑎᓂᑫᐃᐧᐣ ᒋᔑᐊᐸᒋᐦᐊᑲᓀᐨ ᒣᑎᓂᑫᐃᐧᓂᐣᐠ ᐅᐣᒋ ᑲᐱᒥᐃᐧᒋᑫᐨ ᐃᐦᐃᒪ ᓄᐱᒪᑲᒥᐠ ᒥᓇ ᑭᒋᑮᐁᐧᑎᓄᐣᐠ
• ᔓᓂᔭ ᐸᑭᑎᓂᑫᐃᐧᐣ ᐃᐦᐃᒪ ᐊᓄᑮᐃᐧᓂᐣᐠ ᒋᐄᐧᒋᒋᑲᑌᑭᐣ ᒋᒦᓄᒋᑲᑌᑭᐣ ᐲᐊᐧᐱᑯᐊᐸᒋᒋᑲᓇᐣ ᐁᑲ ᒋᐸᐲᑯᓭᑭᐣ
• ᒋᑮᒥᓄᓭᐠ ᐸᐸᒥᑲᑫᐧᑌᐃᐧᓇᐣ ᐅᐣᒋ ᑲᐄᐧᒪᒋᑕᐊᐧᐨ ᒦᓇ ᑕᔒᑫᐃᐧᓇᐣ, ᐃᑭᐁᐧᓂᐊᐧᐠ ᒪᐊᐧᐨ ᐊᓂᔑᓂᓂᐤ ᑕᔒᑫᐃᐧᓇᐣ
• ᒋᓇᐣᑭᓂᑲᑌᐠ ᒋᑭᑫᐣᒋᑲᑌᑭᐣ ᑲᒧᒋᑕᑯᓂᑲᑌᑭᐣ ᒪᒋᑭᑐᐃᐧᐣ ᐊᐸᒋᒋᑲᐣ ᒥᓇ ᑭᒋ ᐅᓇᑲᓂᐣᐠ ᑲᒧᒋ ᐊᐸᒋᑐᐊᐧᐨ ᑕᔒᑫᐃᐧᓇᐣ
• ᒋᓇᐣᑕᐁᐧᓂᒪᑲᓀᐊᐧᐨ ᑲᔕᑲᓑᑭᓀᐲᐦᐃᑫᐊᐧᐨ ᒋᐸᑭᑎᓇᒧᐊᐧᐨ ᐅᑎᓇᑭᐣᒋᑫᐃᐧᓂᐊᐧ ᐃᐦᐃᒪ ᓄᐱᒪᑲᒥᐠ ᒥᓇ ᐣᑭᒋᑮᐁᐧᑎᓄᐣᐠ ᒋᑌᐲᓇᑭᐣᒋᑲᑌᑭᐣ ᐊᐸᒋᒋᑲᓇᐣ ᑲᐃᓇᑭᐣᒋᑲᓂᐊᐧᐣᐠ ᐅᑌᓇᐣᐠ
• ᒋᐸᑭᑎᓂᑲᑌᐠ ᑲᑲᑫᐧᑌᐱᓂᑲᑌᑭᐣ ᒋᐊᐣᒋᓭᑭᐣ ᑭᓑᐱᐣ ᑲᐃᓇᒋᑲᑌᐠ ᐊᐸᒋᒋᑲᓇᐣ ᑲᐃᓇᒋᑲᓂᐊᐧᐣᐠ ᐊᐣᒋᓭᑭᐣ
• ᒋᐊᐣᑎᓂᑲᑌᐠ ᑲᐃᓇᑌᐠ ᑲ ᐊᐸᒋᒋᑲᑌᐠ ᒋᓂᓯᑕᐃᐧᓂᑲᑌᑭᐣ ᑫᐃᔑᐊᑌᑭᐣ ᐊᐸᒋᒋᑲᓇᐣ
• ᒋᐸᑭᑎᓇᑲᓀᐨ ᔓᓂᔭ ᒋᓇᐱᓯᒋᑲᑌᑭᐣ ᐊᐸᒋᒋᑲᓇᐣ ᒣᑲᐧᐨ ᐅᔑᒋᑲᑌᐠ ᑲᔦᒪ ᐊᐊᐧᔑᒣ ᒪᒥᓄᒋᑲᑌᑭᐣ ᐱᐊᐧᐱᑯ ᐊᐸᒋᒋᑲᓇᐣ
• ᒋ ᐊᐊᐧᔑᒣ ᒋᓇᒋᑲᑌᐠ ᐊᓂᐣ ᐊᓄᑮᐃᐧᐣ ᑫᐃᔑ ᒪᐣᓯᓭᐠ ᒋᓇᑲᒋᒋᑲᑌᑭᐣ

ᐊᐦᐊᐁᐧ CRTC ᐅᒥᓀᐧᐣᑕᓇᐊᐧ ᑭᑎᑭᑐᐃᐧᓂᐊᐧ ᒋᐸᑭᑎᓇᒣᐠ ᐃᓂᐁᐧᓂᐊᐧᐣ ᐅᐣᒋ ᑲᐃᓀᐣᒋᑲᑌᑭᐣ ᒋᑭᐊᐣᑕᒋᑲᑌᑭᐣ. ᔕᑯᐨ, ᐊᐦᐊᐁᐧ CRTC ᐅᑎᔑᓇᐣᑕᐁᐧᐣᑕᓇᐊᐧ ᒋᑭᓄᑕᐊᐧᐨ ᐊᓂᔑᓂᓂᐤ ᐱᐊᐧᐱᑯᐣ ᑲᐱᒥᐃᐧᒋᑫᐊᐧᐨ ᒦᓇ ᐊᓂᔑᓂᓂᐤ ᑕᔒᑫᐃᐧᓇᐣ ᐅᐣᒋ ᒋᑭᓇᓴᑲᓀᐨ ᔓᓃᔭ ᑫᐸᑭᑎᓇᑲᓀᐨ ᐅᐣᒋ ᐊᓄᑮᐃᐧᓇᐣ ᒋᔑᐊᒋᑲᑌᑭᐣ ᐃᐦᐃᒪ ᐊᓂᔑᓂᓂᐤ ᑕᔒᑫᐃᐧᓂᐣᐠ ᒥᓇ ᑲᔦ ᐸᐸᒥᑲᑫᐧᑌᐃᐧᐣ ᑫᐃᔑᒥᓄᓭᐠ ᐅᐣᒋ ᑲᔕᑲᓑᑭᓀᐲᐦᐃᑫᐊᐧᐨ ᒥᓇ ᑕᔑᑫᐃᐧᓇᐣ.

ᐊᐦᐊᐁᐧ CRTC ᐅᓇᐣᑕᐁᐧᐣᑕᐣ ᐊᓃᐣ ᑮᐣ ᐁᓀᐣᑕᒪᐣ ᐅᓄᐁᐧᓂᐊᐧᐣ ᑲᑫᐧᑌᐃᐧᓇᐣ ᑲᓃᐱᑌᐲᐦᐃᑲᑌᑭᐣ, ᑲᐃᑭᑐᒪᑲᑭᐣ ᐅᐣᒋ ᔓᓃᔭ ᐸᑭᑎᓂᑫᐃᐧᐣ ᐊᓄᑭᐃᐧᓇᐣ ᐅᐣᒋ ᑫᐃᔑᐊᑌᑭᐣ ᐊᓂᔑᓂᓂᐤ ᑕᔒᑫᐃᐧᓂᐣᐠ:

ᑲᑫᐧᑌᐃᐧᐣ 1. ᐊᐊᐧᓀᓇᐠ ᑫᑮᔕᐳᓭᐊᐧᐨ ᒋᑮᑲᑫᐧᑌᐊᐧᐨ ᔓᓃᔭᓇᐣ ᑲᐸᑭᑎᓂᒥᐣᐨ ᑫᐃᓇᓴᑲᓀᐨ?

1. ᐊᐦᐊᐁᐧ ᔓᓃᔭ ᐸᑭᑎᓂᑫᐃᐧᐣ ᓇ ᑫᐃᓇᐱᐨ ᒋᒦᓇᑲᓀᐊᐧᐨ ᑕᔑᑫᐃᐧᓂᐣᐠ ᑲᐃᓇᑌᐠ ᐊᓂᔑᓂᓂᐤ ᐅᐣᒋ ᑲᑎᐯᐣᑕᒧᐊᐧᐨ ᐱᐊᐧᐱᑯ ᐊᐸᒋᒋᑲᓇᐣ ᑲᔦᒪ ᒋᓇᓴᑲᓀᐨ ᔓᓃᔭ ᑲᐸᑭᑎᓇᑲᓀᐨ ᑕᔑᑫᐃᐧᓂᐣᐠ ᑲᔦᒪ ᑲ ᐊᓂᔑᓂᓂᐤ ᑎᐯᒋᑲᑌᐠ ᐱᐊᐧᐱᑯ ᐱᒥᐃᐧᒋᑫᐃᐧᓇᐣ?
2. ᑭᓑᐱᐣ ᐁᐦᐊ, ᐊᓂᐣ ᑫᐃᓇᒋᑲᓂᐊᐧᐣᐠ ᐊᓂᔑᓂᓂᐤ ᑲ ᑎᐯᐣᑕᑭᐣ ᐱᐊᐧᐱᑯ ᐊᐸᒋᒋᑫᐃᐧᐣ ᒪᒋᑕᐃᐧᐣ ᑫᐃᔑᓂᓯᑕᐃᐧᓂᑲᑌᑭᐣ?

ᑲᑫᐧᑌᐃᐧᐣ 2. ᐊᓂᐣ ᑫᑐᑕᐣᐠ CRTC ᒋᓂᓯᑕᐃᐧᓇᐣᑭᐣ ᐊᓂᔑᓂᓂᐤ ᑕᔒᑫᐃᐧᓇᐣ ᑫᑭᑌᐱᓇᐊᐧᐨ ᔓᓂᔭᓇᐣ?

1. ᐃᐦᐃᐁᐧ ᒪᔭᒼ, ᐊᓂᐣ ᐃᓂᐁᐧᓂᐊᐧᐣ ᐊᓂᔑᓂᓂᐤ ᑕᔒᑫᐃᐧᓇᐣ ᐁᑲ ᑲᐃᔑᐊᑌᑭᐣ ᐊᓂᔑᓂᓂᐤ ᐃᓑᑯᓂᑲᓇᐣ ᑲᔦᒪ ᑲᐯᔒᐃᐧ ᐊᐦᑭᐣ ᑫᐃᔑ ᓂᓯᑕᐃᐧᓂᑲᑌᑭᐣ?

ᑲᑫᐧᑌᐃᐧᐣ 3. ᐃᓂᐁᐧᓂᐊᐧᐣ ᓇᐸᐸᐣᒋᑲᓇᐣ ᑫᐃᔑ ᓇᑲᒋᒋᑲᓂᐊᐧᐣᐠ ᑯᑕᑭᔭᐣ ᒪᒪᐣᑕᐤ ᐱᐊᐧᐱᑯ ᔓᓂᔭᐣ ᔕᑲᓑᑭᓀᐲᐦᐃᑫᐃᐧᓇᐣ ᒋᑮᓇᒋᑲᑌᑭᐣ ᐅᐦᐅᒪ ᑲᐃᔑ ᐸᑭᑎᓇᑲᓀᐨ ᔓᓃᔭ?

1. ᐃᓂᐁᐧᓂᐊᐧᐣ ᓇᐸᐸᐣᒋᑲᓇᐣ ᓇ ᑕᐄᑲᑌᓂᑲᑌᐊᐧᐣ, ᑕᓇᐣᑭᓂᑲᑌᐊᐧᐣ, ᑲᔦᒪ ᒋᐊᐣᑕᒋᑲᑌᑭᐣ ᒋᔑᑲᓇᐊᐧᐸᐣᒋᑫᒪᑲᐠ ᑲᐃᔑᓇᐣᑕᐁᐧᐣᑕᑯᐠ ᒋᑭ ᑲᓇᐊᐧᐸᐣᒋᑲᑌᑭᐣ ᐊᓂᔑᓂᓂᐤ ᑕᔒᑫᐃᐧᓇᐣ?
2. ᑭᓑᐱᐣ ᐊᓂᐣᑕ ᓇᐸᐸᐣᒋᑲᓇᐣ ᓂᑲᑌᓂᑲᑌᑭᐣ, ᓇᐣᑭᓂᑲᑌᑭᐣ, ᑲᔦᒪ ᐊᐣᑕᒋᑲᑌᑭᐣ, ᒋᓂᓯᑕᐃᐧᓂᑲᑌᑭᐣ ᐃᓂᐁᐧᓂᐊᐧᐣ ᑲᐃᓀᐣᒋᑲᑌᐠ ᒥᓇ ᐁᑯᓀᐣ ᑲᐅᐣᒋ ᐊᐣᑕᒋᑲᑌᑭᐣ.

ᑲᑫᐧᑌᐃᐧᐣ 4. ᐃᐦᐃᐁᐧ ᐊᐊᐧᔑᒣ ᒋᒥᓄᓭᑭᐣ ᒪᒋᑭᑐᐃᐧᐣ ᐊᐸᒋᒋᑲᐣ ᑲ ᑕᑯᓂᑲᑌᑭᐣ, ᐁᑯᓀᓇᐣ ᑫᒥᓄᓭᐦᐃᐁᐧᒪᑲᑭᐣ ᐅᐣᒋ ᔓᓃᔭᐃᐧ ᒪᒋᑖᐃᐧᓇᐣ ᒥᓇ ᐃᓈᑎᓰᐃᐧᓇᐣ ᒥᓄᓭᐃᐧᐣ ᑫᑮᑐᑕᒧᐊᐧᐨ ᐊᓄᑮᐃᐧᓇᐣ ᑫᑭᐸᑭᑎᓇᒧᐊᐧᐨ ᐃᐦᐃᒪ ᐊᓂᔑᓂᓂᐤ ᑕᔑᑫᐃᐧᓂᐣᐠ?

1. ᐊᓂᐣ ᑫᑮᑐᒋᑲᑌᐠ ᒋᑮᓇᑲᒋᒋᑲᑌᑭᐣ ᑫᐃᔑᒥᓄᓭᐠ ᐊᐲ ᓇᑲᒋᒋᑲᑌᑭᐣ ᒪᒌᑖᐃᐧᓇᐣ?

ᑲᑫᐧᑌᐃᐧᐣ 5. ᑕᑮ ᐅᓇᐣᑭᓱ ᓇ ᔓᓃᔭ ᐅᐦᐆᒪ ᒋᑮᔑᐸᑭᑎᓇᑲᓀᐨ?

1. ᐊᓂᐣ ᑫᑐᑕᐊᐧᑲᓀᐨ ᔓᓃᔭ ᒋᑭ ᐊᐣᒋᐸᑭᑎᓇᑲᓀᐨ ᒥᓂᑯᐠ ᑲᐃᓇᑭᐣᑌᐠ ᑲᐅᑕᐱᓂᑲᑌᑭᐣ ᒫᒌᑕᐃᐧᓇᐣ ᑭᓑᐱᐣ ᐊᐊᐧᔑᒣᓭᐠ ᑫᐃᓇᑭᐣᑌᐠ ᑲᔦᒪ ᑕᐸᓴᐠ ᑲᑮᓇᑭᐣᒋᑲᓂᐊᐧᐣᐠ?

ᑲᑫᐧᑌᐃᐧᐣ 6. ᐊᓃᐣ ᑫᑮᑐᑕᒧᐊᐧᐨ CRTC ᒋᑮᑌᐱᓇᐊᐧᐨ ᐊᓂᔑᓂᓂᐤ ᑕᔒᑫᐃᐧᓇᐣ ᒥᓇ ᐱᐊᐧᐱᑯᐃᐧ ᐱᒥᐃᐧᒋᑫᐃᐧᓇᐣ ᒋᔑᑭᑫᐣᒋᑲᑌᐠ ᐁᑭᑫᐣᑕᒧᐊᐧᐨ ᐃᓂᐁᐧᓂᐊᐧᐣ ᔓᓃᔭᓇᐣ ᐁᐊᔭᓂᐨ?

ᑲᐄᐧᒪᒋᑕᐊᐧᐨ ᓇᐣᑕᐁᐧᐣᑕᑯᓯᐊᐧᐠ ᒋᐊᐧᐸᒪᐊᐧᐨ ᑕᔒᑫᐃᐧᓇᐣ ᑫᓇᑭᓑᑲᒧᐊᐧᐨ ᑲᐃᓀᐣᒋᑲᑌᐠ ᒋᔑᐊᑌᐠ ᒪᒋᑕᐃᐧᐣ. ᑕᑲᑫᐧᑌᐊᐧᐠ ᑕᔒᑫᐃᐧᓂᐣᐠ, ᒋᐃᐧᐣᑕᒧᐊᐧᐨ ᐄᐧᐣᑕᒪᑫᐃᐧᓇᐣ ᐅᐣᒋ ᒫᒋᑕᐃᐧᐣ, ᒥᓇ ᒋᐸᑭᑎᓇᐊᐧᐨ ᑕᔒᑫᐃᐧᓇᐣ ᒋᓇᑫᐧᑕᒧᐊᐧᐨ. ᒦᐦᐅᐊᐧ ᑮᒌᓀᐣᑕᑯᐣ ᐅᐣᒋ ᐊᓂᔑᓂᓂᐤ ᑕᔒᑫᐃᐧᓇᐣ ᑲᑎᐯᐣᑕᒧᐊᐧᐨ ᐊᓂᔑᓂᓂᐤ ᒥᓇ ᑎᕒᐃᑎ ᒥᓃᑯᐃᐧᓇᐣ ᑫᐃᔑᓇᑭᓑᑭᑫᒪᑲᐠ. ᐊᐦᐊᐁᐧ CRTC ᐅᓇᐣᑕᐁᐧᐣᑕᓇᐊᐧ ᑭᑎᓀᐣᑕᒧᐃᐧᓇᐣ ᐅᐣᒋ ᐅᓄᐁᐧᓂᐊᐧᐣ ᑲᑫᐧᑌᐃᐧᓇᐣ ᐅᐣᒋ ᑫᐃᔑᓇᑯᐠ ᓇᑭᓑᑲᒋᑫᐃᐧᐣ ᐃᑭᐁᐧᓂᐊᐧᐣᐠ ᑲᐄᐧ ᒪᒋᑕᐊᐧᐨ ᒥᓇ ᑕᔒᑫᐃᐧᓇᐣ:

ᑲᑫᐧᑌᐃᐧᐣ 7. ᐊᓃᐣ ᑫᐃᔑᓇᑯᐠ ᓇᑭᓑᑲᒋᑫᐃᐧᐣ ᐊᐧᐸᒪᑲᓀᐊᐧᐨ ᐊᓂᔑᓂᓂᐤ ᑕᔒᑫᐃᐧᓇᐣ ᑫᑭᑐᑕᒧᐊᐧᐨ ᑳᐄᐧᒪᒋᑕᐊᐧᐨ ᒋᑮ ᓇᑯᑐᐊᐧᐨ ᑲᐃᔑ ᓇᐣᑕᐁᐧᓂᒪᑲᓀᐊᐧᐨ?

1. ᑕᐃᓯᓭ ᓇ ᑳᐄᐧᒪᒋᑕᐊᐧᐨ ᒋᑮ ᐊᐸᒋᑐᐊᐧᐨ ᐄᐧᐣᑕᒪᑫᐃᐧᐣ ᑲ ᐊᑌᑭᐣ ᐃᐦᐃᒪ ᐊᓂᔑᓂᓂᐤ ᒥᓇ ᑎᕒᐃᑎ ᒦᓂᑯᐃᐧᓇᐣ ᐄᐧᐣᑕᒪᑫᐃᐧᐣ ᑲᐃᔑᐊᑌᑭᐣ (ATRIS) ᑲᔦᒪ ᑯᑕᑮᑲᐣᐠ ᑫᐅᐣᒋᓂᓯᑕᐃᐧᓂᑲᑌᑭᐣ ᒦᓇ ᒋᓇᑭᓑᑲᐊᐧᐨ ᐃᓂᐁᐧᓂᐊᐧᐣ ᐊᓂᔑᓂᓂᐤ ᑕᔒᑫᐃᐧᓇᐣ?

ᑲᑫᐧᑌᐃᐧᐣ 8. ᐊᓃᐣ ᑫᑐᑕᒧᐊᐧᐨ ᑳᐄᐧᒪᒋᑕᐊᐧᐨ ᒋᐊᐧᐸᐣᑕᐦᐃᐁᐧᐊᐧᐨ ᐅᐄᐧᒋᐦᐃᐁᐧᐃᐧᓂᐊᐧ ᐅᐣᒋ ᐊᓂᔑᓂᓂᐤ ᑕᔒᑫᐃᐧᓇᐣ?

ᑲᑫᐧᑌᐃᐧᐣ 9. ᐊᓃᐣ ᑫᑐᑕᒧᐊᐧᐨ CRTC ᒋᑮᓇᑲᒋᑐᐊᐧᐨ ᒪᐊᐧᒋᐦᐃᑎᐃᐧᓇᐣ ᐃᐦᐃᒪ ᐊᓂᔑᓂᓂᐤ ᑕᔒᑫᐃᐧᓂᐣᐠ ᐋᐲ ᓇᑲᒋᒋᑲᑌᑭᐣ ᔕᑲᓑᑭᓀᐲᐦᐃᑲᓇᐣ?

ᐊᓂᐣ ᑫᑭᑐᑕᒪᐣ ᐄᐧᑕᑮᐧᔭᐣ

ᒥᓂᑯᐠ ᐊᐲ ᑫᐲᐦᐃᑯᔭᐣ ᐃᓇᑭᐣᓱᐨ 21 ᐊᐱᑕᐃᐧᓃᐱᐣ ᑮᓯᐢ 2023 ᒋᑮᐸᑭᑎᓇᒪᐣ ᑭᑎᑭᑐᐃᐧᓇᐣ ᐊᓃᐣ ᑫᑮᔑᒦᓄᒋᑲᑌᐠ ᒪᒪᐣᑕᐤᐱᐊᐧᐱᐠ ᔓᓃᔭᐃᐧᐣ.

ᑫᑐᑕᒪᐣ ᐄᐧᐸᑭᑎᓇᒪᐣ ᑭᑎᑭᑐᐃᐧᓇᐣ ᐅᐦᐅᒪ:

• ᐄᐧᐊᐸᒋᑐᔭᐣ ᐲᐊᐧᐱᑯᐣᐠ ᔕᑲᓑᑭᓀᐱᐦᐃᑲᐣ;
• ᐲᒋᓂᐣᔕᐦᐊᒪᐃᐧᔑᔭᐣᐠ ᒫᒌᐊᓯᒋᑲᐣ ᐃᐦᐃᒪ 819-994-0218; ᑲᔦᒪ
• ᐄᐧᐱᒪᐣᓯᓇᐦᐊᒪᐃᐧᔑᔭᐣᐠ ᐅᐦᐅᒪ CRTC, Ottawa, Ontario K1A 0N2.

ᐊᓃᐣ ᑫᑐᑕᒪᐣ ᐄᐧᑲᑫᐧᑌᔭᐣ ᐊᐊᐧᔑᒣ ᐄᐧᐣᑕᒪᑫᐃᐧᐣ ᐅᐣᒋ ᐊᓃᐣ ᑫᑮᑐᑕᒪᐣ ᐄᐧᑕᑮᐧᔭᐣ ᐅᐦᐅᐁᐧ ᑲᐄᐧᑐᒋᑲᑌᐠ

ᑫᐃᔑ ᑌᐱᓂᔑᔭᐣᐠ ᐃᐦᐃᒪ ᐲᐊᐧᐱᑯᐣᐠ ᒪᐣᓯᓇᐦᐃᑫᐃᐧᐣ ᐅᐦᐅᒪ FLB-BBF@crtc.gc.ca ᑲᔦᒪ ᒫᒌᑭᑐᐃᐧᓂᐣᐠ ᐆᐦᐅᒪ 1‑877‑249‑2782.